Daw pynman yaka Muka Fiesta 2023 kawa ar sngi kam chibynta ka Miss Jowai

Ka Muka Fiesta 2023 daw pynman ya ka hei sien wa nyngkong yow pynyoo yei sap i phong, ka dustur riti, i riam i bait, ki baam ki dih yong ka Ri-loom Jaiñtia waroh kawi wei heijooh i por yow pynpawnaam ya ki thaw uiñke suwari wa em ha ka.

Ya kani ka tamasa da pynman da ka Diza’s Socio & Sports Club ar sngi kitæ haka 21 wa 22 tarik uni u bnai (December) ha Wahsang, Lad Mukhla wa em hajan ha nan Thadlaskein hadien wa High Winds.

Kam chibynta kani ka Muka Fiesta daw pynman leh yaka Miss Jowai 2023 haka sngi nyngkong katæ ka 21 tarik, daw emlang leh ka pynyoo riam wa tip kam ka Butterfly Collection Fashion Show wei daw pynphooh leh ya kani ka sngi da u khloor ka Bollywood, u Siddharth Gupta najrong kiwi ki pynwyrngia da ki tem ki rwai.

Ha ka sngi wa ar katæ ka 22 tarik daw pteiñ da ka tem ka put da kiwa napoh Ri-loom Jaiñtia deilang wa ki DJ wa pawnaam kam u Romeo Blanco uwa na Belgium uwa da jooh tem ha Tomorrowland Festival la 6 sien. Daw emlang leh u DJ NYK uwa da jop yaka Bollywood DJ Award la le sien wa u DJ Vikash Kaser uwa na Pune.

Related posts

Saam ka Kur Soo Kpoh Khadar Wyrnai ya ka song poisa cha kiwa pam Lucky Draw

May 5, 2025

Ka Result Lucky Draw ka Seng Samla Seiñ Raij Satpator

May 1, 2025

Ha waroh kini ki ar sngi, ki paidbah daw yoh ki wow maad ya ki jait baam wa har rukom, ki jait dih, ki jait yalehke wa boon jait, daw em leh ki mar wa dai kiwa pynmih napoh ka Ri-loom Jaiñtia.

“Sñiawkmen i wow pynman yakani ka Muka Fiesta 2023 hei sien wa nyngkong kawa man leh kam chibynta wow lehkmen yei mahajon iwa em ha i nadooh ka dustur riti, ka riam ka bait wa i mynsien yatylli hapyrdi kiwa boon wa em cha ka thaaiñ yong i,” da ong ka Diza Laloo kam kawa pynman ya kani ka tamasa.

Da ong ko leh wa ha kini ki ar sngi daw yoh u pynyoo pyrthai yei sap i phong kiwa boon wei daw pynman ya kani ka tamasa heitæ i rukom wym ktah yaka soodong sookun deiwa man chi sur waka bei rym-aw.

Neiliang won u Aris J Nongkynrih, Organizing Partner da ong u wa kani ka Muka Fiesta ym man ko du kam wow pynwyrngia tangwa ka wow pynyoo yeiwa da em cha i, u e rynsan ya kiwa em yei sap, u pynku yaka Eco-Tourism wei wow pynku leh ya ka kamai kajih kitu kiwa em yei yong ki hi i khih.

Ya ki Ticket yei phi u thied Online deiwa lai ha ka SKILLBOX https://www.skillboxes.com/events/muka-fiesta wei u ye leh wow thied na ki dukan wa em ha Jowai, Shillong, Khliehriat wa kiwi kiwi de.