Ka Under-19 Men’s Cricket Tournament ka Meghalaya Cricket Association (MCA) daw pynman ya ka chibhah da ka All Jaintia Cricket Association (AJCA) ha madan Khliehtyrchi, West Jaiñtia Hills
Ya kani ka Tournament da yabhah da ki ar bynta ka Zone-I waka Zone-II heiwa ka Zone-I toh kawa pynlai daka AJCA ha Khliehtyrchi kawa daw sdang nadooh ka 18 tarik uni u bnai hadooh ka 28 tarik uni hi u bnai. Katwa ya ka Zone-II daw pynman ha Alotgre Cricket Ground, Tura kamjooh leh ya ka Final kani ka Tournament kawa daw pynman ha ka 02-05-22 ha Tura.
Hapoh ka Zone-I da phiah hapoh ka Group-A waka Group-B heiwa hapoh ka Group-A da em ka SCA-A, ka SCA-B, Ri-Bhoi CA waka East Khasi Hills CA. Katwa hapoh ka Group-B da em ka AJCA, ka South West Khasi Hills CA waka East Jaiñtia Hills CA.
Haka Zone-2 da em du kawi ka Group wa em ka Tura District CA, ka North Garo Hills CA, East Garo Hills CA waka South Garo Hills CA.
Hapoh ka Zone-I kiwa yoh nyngkong na jar jiar ka Group daw yachem ki hapoh ka Zone-I Final wei kiwa jop ya kani daw yachem ki wa kawa yoh nyngkong ha ka Zone-II kawa man leh kam ka Final kani ka Tournament.
Ha kani ka Tournament ym em ka song poisa ya kiwa jop tangwa kiwa yalehke daw yoh ki da ka nong sngi kut wa yaleh ki.
Ha ka 18 tarik ka yalehke u sdang ko hapyrdi ka Shillong CA (A) waka Ri-Bhoi CA ha Khliehtyrchi.
