Ka tamasa wa tip kam ka Waikhyrwi Festival wa pynman daka Waikhyrwi Sports Club & Social Organisation Dkhiah West daw pynman yaka haka 13 wa 14 tarik uni u bnai Kmaichonglad (Dec) 2022 ha Teilang Playground, Dkhiah West hajrong ka phang ‘Save Green Save Life’.
I thmu kani ka tamasa toh wow sah kynmoo ya ka parom ki waheh nachwa kam ka parom u Who Rondi waka Lidakha kiwa man ki khon ki raiot ki jait Syiem Sutnga.
Kani ka tamasa man ko leh kam chibynta wow pynchlur yei pynneh pynsah yaka bei rymaw wei wow pynku leh ya ki kaam uiñke suwari kiwa em haka thaaiñ.
Ha kini ki ar sngi daw em ki lai Trekking, ki yalehke yong tynre (Traditional Games), ka pynyoo riam (Fashion Show), ki yakob dro dur (Drawing Competition), ki tem ki put, ki DJ wei daw pynyoo leh daka Live Telecast ya ki ar tylli ki yalehke Semifinal ka World Cup.
Haka 13 tarik daw wan pynwyrngia daka Jessie Lyngdoh deilang wa ki lok yong ka wei daw em leh u DJ Frex wa u DJ Gavian wa kiwi de kiwa tem wa rwai kam ka Kyntiewlin Mawphniang, u Jefferson Lyngdoh (JGT), Mechan Dkhar, ka Orchestra Group Dkhiah, Whoosh, Never End (Shillong), Mercy Ngamlai wei daw em leh ka Cultural Fashion Show.
Haka 14 tarik daw wan kiwa tem wa pawnaam ka Sikkim kiwa da dep lai tem leh cha Europe, kitæ ka Girish & The Chronicles, kiwa tem wa pawnaam ka East Jaiñtia Hills ki Dewsrops, kiwa tem wa pawnaam ka Jowai ki The Lynx wa ki Seis Euphony, daw em leh ka Lily Sawian wa u DJ Banshan, u Wanjop Sohklet, kiwa tem wa tip kam ki When Hard Not Died wa kiwa chaad ka Jainñtia Got Talent.
Ka bai psiah haka 13 tarik man ko T. 300 katwa haka 14 tarik man ko T. 400. Yei tip bniah ye phi u Phone ha kini ki Number: 9862920983, 7005444350.
