Haka yachem hapyrdi ki arseiñ ka All Jaiñtia Transporter’s Association wa ka Meghalaya People’s Labour Union ha Jowai ynne ka 6 tarik. Wei ha kani ka yachem da yaklam hajrong i wym pynkrehkaam næ chimkhia yong ka sorkar Meghalaya ya i rai yong ka Supreme Court ka ri India heiyatoh wa ka kaam khayi wei tih mooyong hapoh Meghalaya wei da yaklam leh yei eh wa mih na ka FASTag ha ki Toll Gate wei da pynrem yei kreh khalær ka NHAI wa pynmih yei eh yei lai i wan ki paidbah.
Da yaklam leh yei eh i khoo ki tre truck hajrong i dor baikit wa booh ka sorkar Meghalaya. Wei da em ka sñiawthooh yumut leh ya kiwa bon ki eh u paidbah wa mih nei rukom krehkaam ka sorkar i wym biang.
Hadien wa da klam sani bha, da seiñ ya ka Meghalaya Joint Action Committee for Solution of Public Grievances. Da jied ya u Balen Thubru kam u Convenor, u Erwin K Syiem Sutnga, Advocate kam u Co- Convenor, ya u Dawniwon Chulet kam u Secretary I/c East Jaiñtia Hills District wa ya u Kyrshan Dkhar Secretary I/c West Jaiñtia Hills District.
Da rai leh wow khut yalang paidbah ha ka 11 tarik uni u bnai ha 7 Mer West Jaiñtia Hills District heipor 11 waje i step wow yaklam ya ini i eh. Da khut ya waroh ki tre truck, kari kamai, ki wakreh mooyong moochuni, kiwa yah kari, ki handyman, kiwa khayi mooyong, moochuni, chyiap, moo wa kiwi kiwi, ki tre paar mooyong, moochuni, chyiap, moo wa kiwi kiwi, ki seiñbhalang, ki manbei manpa, ki khynroo khyllood ka ri Jaiñtia wa Khasi leh wow klam wei wow chim yaka rai. Da kyrpaad wow ya chimkhia ya ini i eh wow ya wan paidbah cha ka yalang.
Discussion about this post