Ka seiñ kiwa sikai skur SSA, ka Meghalaya SSA School Teachers’ Association (MSSASA) da pyntip ki wa daw pynman ki yei yakhih ha Shillong ha ka 9 tarik u Khonchonglad (Nov) 2021.
Hawa yaklam wa kiwa thoh khubor, u President ka Association, u Aristotle Rymbai da ong u, “Neidaw wym em yoh iyi iyi i jubab na ka sorkar, kamtæ da dep i wow pynman ya ka General Executive Committee Meeting ka Central Body heiwa da chim ya ka rai wow lai chakhmat wow pynman ya ka yakhih deiwa lai paidbah ha ka 9 tarik u Khonchonglad ha Shillong.”
Ka Association da kdaw ko yei dawa wow chna ya ki kreh sorkar yow kyrriah ya waroh 12,541 ngut kiwa sikai naka State Implementation Society cha ka State Education Department kam ki wakreh wa pura katkam ki kyndon ka SSA RTE, yow pynkrehkaam ya ka tulop wa da pynku da pynthymme neibynta waroh 12,541 ngut kiwa sikai SSA hapoh ka Meghalaya wei wow pynlait ya 4 bnai ka tulop wa dang sah itæ neibynta u Naiynru hadooh u Naikhynde.
Hawa kylli kammon jubab u Montri ka chnat Puræ Puthi, u Lahkmen Rymbui yei wym yoh ya ka tulop wa soo bnai, u Aristotle da ong u wa u Montri toh u pait u ya ka aiñ RTE Act kawa ong wa lada ka sorkar pyrdi ym ye ko wow phah ya ka poisa hei por wa biang, toh i kamram ka sorkar jylla wow pynbiang ya ka poisa yow su ya ka tulop kiwa sikai.
Yow tip yei daw wa slem u yoh tulop wei yei slem u poi ka poisa, da pyntip u wa da dep yaleh da ka RTI cha ka Ministry of Education ha ka 6 tarik uni u bnai wei da yooluti wow yoh jubab ym slem de.
