Kiwa chet ja skur hapoh ka lama ka All Jaiñtia Mid Day Meal Workers Union Jowai, da maham ki wow mih madan haka 21 tarik uni u bnai ha Shillong lada ka sorkar ym su ko yei nong wa dang sah yong ki kawa da kynjoh 6 bnai kattu.
Hei yaklam wa u President ka All Jaiñtia Mid Day Meals Workers Union, u Jerry Suting wa ka President ka Laskeiñ Unit, ka Phiyooris Syngkon da pynsñiaw ki yei sñiaw diaw wa ka sorkar wym ap ko yei dawa yong ki khamtam najrong wa i su man i iwa khian iwa du T. 1000 donhi chi bnai.
Kamtæ kyntu ki ya u Montri ka chnat puræ puthi ka sorkar jylla wow pynlait noh yaka poisa wa dadep kreh ki, khnang yow yoh u thied kot, u su bai skur yaki khon ki kti ha kam kini ki bnai wa boon i dawa.
Nachwa itæ ha u Naiynru 2019 ka seiñ lyngba ka dorkhat wa dadep e ko cha u Montri Rangbah ka sorkar jylla da dawa ko yaka sorkar wow pynku yei su yong ki namo ka Honorarium naka T. 1000 chaka T. 5000 chi bnai, deiwa su leh waroh 12 tylli ki bnai, u pynyoh ki laad yada ya kiwa chet wei kamjooh leh i su toh u psiah bait haka Bank Account.
Kamtæ ya kani ka jooh ka mat ka seiñ da pynsñiaw biang ko sa ha u D.P. Wahlang, Additional Chief Secretary ka sorkar jylla deiwa lai yachem wa oo deilang wa i thoh ha u Kmaichonglad 2021 tangwa hadooh katte ka sorkar wym em leh ko iyi iyi.
U K.L. Pariat kam uwa e buit ka seiñ pynsñiaw u yei lyngngoh deiwa ong weileh hawa ya kiwa chet Mid Day Meal yong ki Block waphær waphær ka jylla da su nong yaki deiwa pynpsiah bait haki Bank Account, katwa ya kiwa kreh hapoh ka Laskeiñ wa Thadlaskeiñ Block ka West Jaiñtia won hadooh katni dang su beit yaki da ka poisa ha kti.
Hei sakhiat ong u wa wot ka Ministry yong ka chnat puræ puthi kamjooh ka Finance da hukum ko wow su bait haki Bank Account, tangwa ini i leh chiliang wa du yaka Laskeiñ waka Thadlaskeiñ Block da wanrah ko i artatien.
Heiyatoh wa i su nong ya kiwa chet ja skur khana u wa ha u snem 2021 dang sah 5 bnai wa kynthup wa uni u snem won chi bnai.
Da pynbna haroh u wa lada ka sorkar ym su ko yei nong wa dang sah yong kiwa chet Mid Day Meal; ym tohsa de ki u pynman yakhih ha Shillong haka 21 tarik uni u bnai.
