Ka North Eastern Zone Cultural Centre, Dimapur da pynman ko ya ka Painting Workshop and Renovation of Pavilions namo ka yachem kiwa thohdur, kiwa rikor yow pynmiat pynthymme ya ki khilon kiwa man kam chibynta ka dustur riti ka Assam kiwa em ha Shilpagram, Guwahati.
Kani ka Workshop toh kawa sdang nadooh ka 27 tarik uni u bnai wei daw kut ko ha ka 14 tarik u Naichiphaw, 2021 deiwa ya bhah ha ki ar bynta kiwa mar san ngut kiwa thohdur na kawi pa kawi ka jylla ka Northeast India.
Ka bhah wa nyngkong da em kiwa na Assam, Arunachal Pradesh wa Meghalaya.
Ya kani ka Workshop daw pait da u Vezwuso Phesao, Exhibition Officer, NEZCC, Dimapur deilang wa ki heh na Shilpagram, Guwahati. Man ka dhab hap ki wow pynmih ya ki dur kiwa yatoh katkam ka dustur riti ka yong ka jylla wa wan ki heiwa na Meghalaya da chim bynta da u Ericson Majaw, u Ferrando Mawrie, ka Shidalin Chyrmang wa u Fasterfield Ryntathiang. Ka Shidalin Chyrmang toh kawa na ka chnong Umkiang, EJH wei da man ko kawa da dep puræ BFA na Silchar University katwa kiwi won toh kiwa dang pynkhreh wow lai puræ ha uni u snem.
Ya kiwa thohdur na ki jylla da yahkhmat da kiwa da rangbah ha ini i kaam na ki jylla wa wan ki. Ya kiwa na Assam da yahkhmat da u Manoj Roy, Exhibition Officer, Cultural Affairs Department Government of Assam, Guwahati; ya kiwa na Arunachal Pradesh da yahkhmat da u Punyo Chobin, Head of Department, Fine Arts, Rajiv Gandhi University, Itanagar, na Meghalaya da yahkhmat da u Raphael Warjri, Chief Art Director, Riti Academy of Visual Arts.
Ki dhab wa ar daw sdang ki nadooh ka 5 hadooh 14 tarik Naichiphaw, 2021 wei daw kynthup ko leh ya mar 5 ngut kiwa thohdur na Manipur, Nagaland, Mizoram, Tripura wa Sikkim.
