Ynne ka sngi u DC ka West Jaiñtia Hills u Garod LNS Dykes da khut yalang u ya ka Synjuk ki Waheh Chnong Jowai wow yaklam kammon wow yada ya ka wah Myntdu kawa man ka Tawiar Takan kawa pyndap pynbiang um ya ka Jowai wa kiwi ki chnong.
Ha kani ka yalang da emlang u ADC ka District u PK Boro, ki sahep na ka JHADC, ka Urban, CEO Jowai Municipal Board wa kiwi kiwi ki chnat katwa ka yaka Synjuk ki Waheh Chnong, Jowai da yahkhmat u President u Alan Niangti, u Secretary, u Riquoma RQ Laloo wa kiwi kiwi ki waheh chnong wa ki Secretary chnong na Jowai.
Neiliang u Garod da pyntip u wa ya kani ka yalang da khut hadien wa e dorkhat ka Synjuk hajrong ki kaam wow yada ya ka wah Myntdu.
Ha ka yalang da yaklam hajrong wow chna ya ka Calendar ki kaam wow kreh chi snem heiyatoh wow yada ya ka wah i wow sdang nadooh u Naitung (April) i wow man chi snem.
Da yaklam leh hajrong i tih moo tih chyiap na ka wah Myntdu kamjooh i noh jhep noh khyndaw hajan ka wah wa i sait that sait kari heiwa da kyntu ya u DC wow pynmih hukum wow khang ya kini ki kaam.
U Garod da pyntip u wa i tngit ka wah Myntdu toh nei pyntooid pynkai ya ki jakhlia (Liquid Waste) na ki yung cha ka wah khamtam boon ki yung ha Jowai ki wym em tang ki Septic Tank heiwa da rai wa ka chnat Urban wa ka Municipal u thoh ki cha waroh ki chnong hajrong ini khnang wow ye u bood ya ki kyndon ka sorkar hajrong kini kiyi kiyi waroh.
