U Chief Election Officer ka Meghalaya, u FR Kharkongor hadien wa khlaad noh u kyrtong ka UDP, u HDR Lyngdoh ynne i janmiet da pyntip u wa hapoh ka Sohiong Constituency wa daw pynsangeh chwa yei thap Vote.
Katkam ka aiñ Representation of the People Act, 1951 da ong wa lada em u kyrtong wa khlaad chwa ka sngi thap Vote, u Returning Officer hadien wa pyndep u wow leh yeiwa emkaam daw pynmih u ya ka hukum wow pynsangeh chwa yei thap Vote wei ka kyndon leh man ko wa u kyrtong toh u yong ka Party kawa da tipmit.
Ka Election Commission of India won daw khut ko ya kani ka Party kawa da tipmit yow e laad ya ka wow pynbna kyrtong da uwi wei ka Commission daw pynbna ko ya ka tarik wa thymme wow thap Vote.
Kam wow pynkynmoo wa hapoh ka 23-Sohiong Constituency da em 6 ngut ki kyrtong wa kynthup ya u H. Donkupar R. Lyngdoh (UDP), u S. Osborne Kharjana (INC), u Samling Malngiang (NPP), u Sandor Ryntathiang (HSPDP), u Seraph Eric Kharbuki (BJP) wa u Stodingstar Thabah (AITC).
