Jowai: Ka phlim Pnar kawa tip kam ka Inamorato kawa da chna wa pynwan dur da u Jimmy Raul Kharmuti, kawa da yoh leh ya ka Central Board of Film Certification daw pynyoo baiscope ya kani ka phlim ha Bijou Cinema Hall, Shillong.
Kani ka phlim toh kawa da yang wow pynyoo paidbah ya ka ha Bijou la soo bnai kattu wei man ko ka phlim wa klam hajrong i jæd i pra i chongkha chongman kawa ktah ya ka imlang sahlang. Hawa yaklam wa ki kattu katni ngut ki bru paidbah wa kynthup leh ya ki manbei da ong ki wa da kwah ki na mynsien wow yoh u pait ya kani ka phlim neidaw wa ktik ko yei pyrkhat neidaw wa biang ka yurim yong ka.
Hawa yaklam wa u Director kani ka phlim u Jimmy Raul Kharmuti, da ong u wa em i kyrmen wa khroo wow yoh u pynyoo ya kani ka phlim ha Bijou, Shillong, wei da ong u leh wa ym ye khlem da pynsñiaw yei sñiawngooh ya waroh kiwa kyrchaan ya kani ka phlim kiwa da yaichah wow yang yow pait noh ya kani ka phlim. Kamtæ da kyrpaad ya waroh ki para kur ki paradoh parasnaam wa ya waroh kiwa kyrchaan wow e mynsien ki ya kani ka phlim wei wow e kyrchaan ya kani ka phlim deiwa wan pait wei sakhi da ki khmat ya kani ka phlim ha Bijou Cinema.
Da ong u leh wa ka tarik wa tikna daw pyntip ha kini ki sngi wow wan cha ki laad pathai khubor, wei da em u leh i kyrmen wa skem wow yoh ya i kyrchaan wa pura nadooh ki waheh, ki manbei, ki khon khynroo khyllood, khamtam na ka sorkar jylla thymme hapoh i yahkhmat u Conrad Sangma hajrong ka yurim wa ki kaam pynmih phlim man ko kam kawi na ki laad e khih e khan kamjooh kawa pynyoh kreh leh ya kiwa boon kiwi kiwa emlang ha kani ka kaam wei ki phlim leh toh kiwa ye u wanrah naam rah burom ya ka jylla lada yoh yei kyrchaan wa paka na ki paidbah wa na ka sorkar jylla.
Discussion about this post