Kam chibynta wow pynyoo yei parom kamjooh ki jaitbru waka dustur riti waphær waphær ka thaaiñ North East ka ri India, ka 17th Mumbai International Film Festival daw pynyoo ko ya 13 tylli ki phlim kiwa da chna hapoh ki jylla ka thaaiñ mihsngi ha uni u snem kawa da sdang nadooh ka 29 tarik uni u bnai hadooh ka 5 tarik u Naiynru 2022.
10 tylli na kini ki phlim toh ki Documentary Film wa 3 tylli toh ki Short Film.
Ar tylli toh kiwa da chna chaphang ki jaitbru Galo wa Kaasik wa ki Nocte kiwa em hapoh Arunachal Pradesh.
Kawa na Assam toh chaphang ki Assamese Sikh kiwa da pynemkaam da i ktien Assamese heithaw i ktein Punjabi iwa man u thylliej tre yong ki.
Kawa na Manipur toh chaphang ka 50 snem i pynyoo baiscope ya ki phlim Manipur.
Kiwa naka Mizoram toh chaphang i wan ka khlam COVID-19 wei kammon da ktah ko ya ka imlang sahlang katwa kawi won toh chaphang i miat ki chnong ki thaw ha Mizoram.
Kawa na Nagaland won toh chaphang ki jaitbru Longfuru katwa kawa na Sikkim toh chaphang ki tiar put tiar tem tynre wa kiwi kiwi de.
Kawa na Meghalaya toh kawa da e pyrtuid ‘Because We Did not Choose’ chaphang ki jaitbru Khasi, Jaiñtia wa Garo kiwa lai chimbynta ha ka Thma Bah wa nyngkong ha France wa ha Mesopotamia (katni Iraq, Kuwait).
Kani ka phlim toh kawa chna da u Wanphrang K Diengdoh kawa da chimpor 4 snem u pyndep u thooh bniah ya kiwa lai yaleh thma kam na Jowai, Wahiajer, Sohkha wa Tura.
Ha kani ka phlim da pyrchang wow booddien ya ki thaw wa lai luti kini ki bru kam ha Guwahati, Kolkata, Chennai, London, Liverpool, Wales wa ha France.
Ha kani ka phlim da chem leh ya ki sur wa jooh rwai ki heipor lai thma wei da rwai biang ya ki da kiwa ha yung ha sem yong ki wa katni, da chem leh ya ki kot ki sla wa thoh chaphang kini ki bru kiwa batai yei ktah kani ka thma ya ka jaitbru.
Kiwa boon na kini kiwa lai thma nyngkong da jied ya ki wow kit mar ki tangwa hadien ki leh da hap yaleh thma ki heiwa boon da dooh ki yei mynsien yong ki wei yei pyrtuid yong ki da booh ha ki mot wa em ha ha Jowai wa Shillong tiwa tip katni kam ki Motphran iwa mih na i ktien France.
