Ka Synjuk Waheh Chnong Jowai, ynne ka sngi da khut pynman ko ya ka yalang ha yung Dorbar Chnong Mynthong, Jowai neibynta wow phyllu yumut hajrong ki kaam waphær waphær wa yatoh wa ka chnong Jowai, kiwa kynthup ya i jhep, i sahkut kari neipor cheipor wa kamjooh leh i duna ka um na ka chnat PHE.
Hawa yaklam wa u General Secretary ka Synjuk, u Riquoma Rq Laloo hadien ka yalang da ong u wa ya ki kaam wa yatoh wa i sahkut kari neiliang ka Synjuk daw yachem ko ya ka chnat Traffic kamjooh leh wa u SP ka West Jaiñtia Hills wa kiwi kiwi khamtam wow pynkrehkaam noh ya ki sarok wa dadep chna kamjooh leh kiwa dang sahteiñ khnang wa ym chah ktah ware i lai i wan ki paidbah kamjooh leh ki khynnah skur.
U Riquoma da ong u leh wa heiyatoh wa ka um wa saam ka chnat PHE kawa da taan na Mupiah ym man de ko kawa miat wei ka chnat PHE da ood ko wa ymye de ko wow pynbiang um ha Jowai.
Da ong u wa katkam ka yutip wa da yoh da ong wa ka PHE daw kyrriah noh ko ya i thaw taan um na kiwi tawon ki bynta ka Wah Myntdu hi kawa ye wow man na ki bynta ka Syntu Ksiar, wei hajrong ini neiliang ka Synjuk daw pyrchah ko neibhah lada yoh poisa wow chna thaw taan um thymme weileh wym chna pynmiat ya ka Dam ha Mupiah kawa man ka thaw nadooh nachwa,
Hajrong ini i kaam, ka Synjuk daw lai yachem ko ya u Executive Engineer ka PHE ha ki sngi wow wan.
