Ka synjuk kiwa thoh kot Khasi, ka Khasi Authors’ Society da lehkmen ko ya ka sngi burom yei thoh i tar deiwa pynman ya ka ya phyllu yumut hajrong ka phang ‘Ka Jingieit Ri U Khasi Ha Ka Mynnor bad Mynta’ wei da pynkup burom leh ya ki khynroo khyllood kiwa da lehbha ha ka puræ puthi kawa yatoh wa ka ktien Khasi.
Ha kani ka sngi da emlang leh u Chief Secretary ka jylla, u D P Wahlang kam u kongsan wa ka Melissa Kharpuri, na ka chnat Art & Culture kam ka symbood kongsan.
Hawa e yei klam, neiliang u Wahlang da pynsñiaw u yei sñiawsih wa du ha ka jylla Meghalaya wa ya ka Alternative English da chah wow jied ha ki chlem puræ wei boon ki Khasi da jied ki wow puræ ya da kani wei da kyntait wow puræ ya ka ktien Khasi, tangwa kiwon kiwon ki Khasi kiwa yaleh wow yoh ya ka Schedule Tribe ka kyndon toh u tip ki ya ktien Khasi wei u puræ ki ya ka ktien Khasi.
Da ong u wa da toh i por wa wot ka CBSE toh u em ko ya ka Subject Khasi wei daw pyrchang u wa ini daw leh ha ki skur sorkar pyrdi kiwa tip kam ki EMRS kiwa em hapoh ka jylla. Da khana u leh wa wa kamwa 40 tylli ki Eklavya Model Residential Schools (EMRS) daw wai ha kyllieñ ki raijbah (District) yong ka jylla Meghalaya wei i puræ ya ka ktien Khasi ha kini ki chlem puræ toh iwa emkaam ya waroh ki khynnah wa lai puræ.
Da kynmoo u leh yei por wa dang lai puræ u cha baar jylla, wei da jied u wow puræ ya ka ktien Khasi wot lada ym em kiwa sikai Khasi ha ka thaw puræ heithaw wow jied ya ka ktien Hindi wei dei bor yong oo hi da khreh kot u hadooh wa yoh yei jop ha ka CBSE, wei yeini i jooh leh da pyrchang u neibynta ki khon u.
U Wahlang da ong u leh wa daw pyrchang u wow pyndooh noh ya ka Alternative English na ka MBoSE, khnang wa kiwa lai puræ daw hap ki wow jied da ka ktien thylliej yong ki hi.
Da yoh leh yei klam na u khliehdooh ka synjuk kiwa thoh kot, u Prof. D.R.L. Nonglait, President, Khasi Authors’ Society wei ha ka lympung ya phyllu yumut da chimbynta da kiwa boon kiwa thoh kot wa kynthup ya u Rev. (Dr) O L Snaitang, Prof. LS Gassah, u khliehdooh ka Political Science Department, North Eastern Hill University, u O R Shallam, uwa sikai wa da chong ngiah ka Kiang Nangbah College, Jowai wa u Prof. S Loniak Marbañiang wa da chong ngiah nei silai wei uwa man kam u montri warim ka sorkar jylla.
Kini waroh da klam ki chaphang ka mynsien maya ri iwa nadooh nachwa heipor wa wan buhai wei synchaar embor ki pharæng, hadooh wa kut kani ka synchaar hadooh kini ki por wa i rukom man ka saiñ hima sima. Kiwa klam da kdaw ki leh yei hiar dor ka synchaar khadar ha jylla hadooh wym em de kiwa mihkhmat kiwa stat kam ki por warim.
Ha kani ka sngi da pynkup burom ya phra ngut ki khynroo khyllood kiwa da yoh yei jop wa ha khliehdooh ha ka puræ yei ktien Khasi ha ki chlem hikai. Wei ya kini da e naam da ka da ki syrnot wa ka song pisa, wei kini kynthup i ya u Menangmankhraw Kharkongor (SSLC), u Alden Kenan Massar (ICSE), u Angelus Khongbinan waka Badarisha Mawrie (HSSLC Arts), u Melboreen Massar (HSSLC Commerce), ka Amy Grace Langstieh (HSSLC Science), u Wanhunlang Khyllait (BA) wa u Rilarympei Diengdoh (MA).
Ha chwa u sdang kani ka yalang, ki khynroo ka Seng Khasi College da e ki yei rwai wa pynchit mynsien wei ya ka lympung da pynlai kam ki chongknor da ki dkhot rangbah ka synjuk, u Phrikshon Kharshiing waka Prof. Antoinette Kharmalki. Ha kani ka sngi da pynlait leh artylli ki kot wa da thoh da u Khraw Kupar Kharlukhi wa u Duster Roy Khongngai.
