Ha kini ki 3 tayaw ha East Khasi Hills District kitæ nadooh ka 28 tarik u Naiynru hadooh 4 tarik u Naiynñiaw da leh 7948 tylli ki Test heiwa kiwa yoh ya u khñiang COVID-19 da em ki 1154 ngut iwa mut wa ka Positivity Rate man ko 14.5%.
Ha ka tayaw wa bood nadooh ka 5 tarik u Naiynñiaw hadooh ka 11 tarik u Naiynñiaw da leh 7883 tylli ki Test heiwa kiwa chah ktah da em ki 879 ngut iwa mut wa ka Positivity Rate da man ko 11.15%.
Ha ka tayaw wa le nadooh ka 12 tarik u Naiynñiaw hadooh ka 18 tarik u Naiynñiaw da leh 7920 tylli ki Test heiwa kiwa chah ktah da em ki 890 ngut iwa da pynpoi ya ka Positivity Rate cha ka 11.23%.
I rukum em won kiwa dang chah ktah deiwa yabhah ha ki wa thaw wa man sor wa ki thaw wa em cha palatsor, 65% toh kiwa em cha sor wa 35% kiwa em cha palat sor. Ha ki thaw wa cha sor da em 18 tylli ki dong kiwa em palat 10 ngut kiwa chah ktah katwa kiwa em 5-9 ngut kiwa chah ktah da em ha ki 36 tylli ki dong. Katwa ha ki chnong wa em cha palat sor da em 7 tylli ki chnong wa em palat 10 ngut kiwa chah ktah wa 19 tylli ki chnong wa em 5-9 ngut kiwa chah ktah.
Hajrong ini, neiliang ka DC da ong ko katni da pynkyllooid ya ki kyndon deiwa chah chooh chooh wow wai ki dukan, ki yung krehkaam ki skur wa ki kattu katni ki jait yalehke tangwa emkaam wow man kiwa syndong yow lait nei ku biang kiwa yoh ya uni u khñiang.
Da ong ko leh wa ym toh wow e laad biang wow jia kamwa da jia ha u Naisan uni u snem iwa da yoo maa i boon kiwa yoh ya uni u khñiang hapoh ka District hadooh wa da jan dap ki thaw summar wei kiwa yap leh boon ki. Wei lada ku biang kiwa dang yoh wei dap ki thaw sumaar ym yohsa de khlem da pynrkhiñ biang ya ki kyndon.
Da kdaw ko leh wa kiwa boon kiwa da hap lai rah cha ki thaw sumaar wei kiwa yap toh kiwa ym em yoh tika iwa pynyoo wa kiwa da yoh tika ye ki wow leh pyrchah ya uni u khñiang khlam. Wei da chem leh wa ha ki thaw wa boon kiwa yoh tika, ki bru wa yoh ya uni u khñiang kamjooh leh kiwa yap da duna bha ki.
Kamtæ ka DC da pynmih hukom ko wa ha kiwon kiwon ki dong wa em palat 5 ngut kiwa chah ktah, daw leh ya ka Active Surveillance namo deiwa lai booddien katwa ki dong wa em palat 10 tylli daw hap wow pait bniah bha ya ki. Daw pynman leh yei psiah na iwi i yung cha iwi yow Test ya kiwa em ya ki dak ki chin wa chitom.
Daw pynman leh ya i Test paidbah ha ki dong wa em 5-9 ngut kiwa chah ktah kamjooh kiwa em palat 10 ngut kiwa chah ktah yow chem ya kiwa rah ya uni u khñiang.
Lada emkaam, daw pynman Macro-Containment ya ki thaw wa em palat 10 ngut kiwa chah ktah.
