Ka Meghalaya Football Association (MFA) da pynbna ko wa daw pynman ya ka 3rd Meghalaya State League (MSL) kawa daw sdang ha u Naichiphaw uni u snem. Kamtæ ki Association da hap ki wow pyndep ya ki yalehke yong ki ha ka 30-09-22 yow jied ya kiwa jop na ki District ka jylla kiwa daw ye u chimbynta.
Ya ka thaw yalehke ha uni u snem da pynman da ka Venue Bidding yow jied ya ki thaw wa biang dooh yow pynman ya ki yalehke kiwa ye u pynhun ya ki kyndon ka MFA.
Ha kani ka samoi ka MSL daw yoh yarap poisa ki Club nadooh ka bai lai bai wan, ka bhah na ka bai Ticket kamjooh ka poisa ya kiwa jop.
Neiliang ka MFA da pyntip ko ynne wa daw sdang leh ya ka MFA Youth League neibynta ki U-13, U-15 wa U-17 heiwa kiwa jop daw mihkhmat ki ya ka jylla ha ki lympung yalehbol ka All India Football Federation.
Kamtæ ka MFA da ong ko wa da ini da yooluti wa kiwa em yei sap daw yohlaad ki wow ku wei wow chem leh ya kiwa em yei sap yalehke nadooh wa dang khian ki yow pynku ya ka Meghalaya ha ka yalehbol hapoh ka ri.
