U Chairman ka Jowai Municipal Board (JMB), u Lasooki Lakiang hawa yaklam wa u Wyrta da pyntip u wa ha ka sien nynkong wa man u kam u Chairman iwa 10 bnai chwa wow thung biang da oo hi katni, da pyrchang wow pynsñiawthooh ya ki paidbah kammon wow yabhah yei jhep hapyrdi iwa pyut wa i wym pyut (Wet & Dry Waste) wei da thooh thaw leh yow booh ya ki Recovery Centre wei ya kini dang yang yei mynjur na ka sorkar.
Da pyntip u leh wa ki kattu katni ki Market Committee kam ki yong ka CNI waka Seiñraij Jowai da wan ki chakhmat wow e yei thaw yow man kam ki Recovery Centre yow pynlang yei jhep wa kynthup ya ki kot, ki Plastic, ki nar, ki tiar ki taar Electronics wa kiwi kam kini deilang wa i jhep wa pyut.
Neiliang ki Dorbar Chnong leh kam ka Khimusniang, Chilliangraij da wan ki chaphrang wow ya krehlang yow chna ya kini ki Recovery Centre wei u Chairman da yooluti u deiwa em kam kini ki thaw daw pynduna ko yei mih ki jhep cha yaaw cha haat neibhah ki jhep wa pyut ye wow pynkylla sboh ki.
Chooh chooh da pyntip u wa kam ka Municipal Board won daw chdooh kti ko ya kini 6 bnai wow pynemkaam ya kini ki Recovery Centre hadien wa da yoh poisa na ka sorkar wow chna ya kini hadooh kammon wow pynlai yaaw yei sboh.
Heiyatoh wa ki jhep wym pyut (Dry Waste), da pyntip u Lasoo wa da dep yaklam wa ki karkhana Cement khamtam waka Dalmia Cement wei dang thooh ya ki thaw wow pynlang ya ki Plastic ki wow man kam ki Scrap Centre wei da khut u leh ya kiwon kiwon ki seiñ kiwa smat wow wan ya krehlang neibynta wow leh yeini.
