Daw sdang yaka Clean Green Jowai Campaign

Jowai: Kam chibynta i leh pynemburom ya i dap 75 snem ka kot khubor The Shillong Times, da pynkrehkaam ya ka ‘Clean Up Shillong Campaign’ heiwa da sdang wow pynkhooid ya ki bynta yong ka wah Umkhrah.

Haka 9 tarik uni u bnai haka yalang kawa da khut da u S.K. Lato da yaklam wow sdang kam kani ka jooh ka Campaign ha Jowai leh kam ka dak pynemburom ya i dap 75 snem ka kot khubor The Shillong Times. Ha kani ka sngi wa pynman yaka yalang da emlang ki bru wa pawkhmat wa kiwa yahkhmat yong ki kattu katni tylli ki seiñ ka chnong Jowai. Ha kani ka sngi da wan hiar leh na Shillong da u Manas Choudhury u tre yong ka The Shillong Times, ka Patricia Mukhim ka Editor yong kani ka jooh ka kot khubor waka Jannet Street kawa embynta haka Clean Up Shillong Campaign. Ka yalang ha kani ka sngi da iwi i yumut da rai wow sdang ya kam kani ka jooh ka prokram ha ka chnong Jowai wei da jied ya u S.K. Lato kam u President, u Arwotki Sumer kam u Vice President, u H.H. Mohrmen kam u Secretary wa u Rudolph A. Laloo kam u Assistant Secretary.

Kani ka Committee wa thymme da chong pyrkhat ko ha ka 13 tarik uni u bnai wei da rai wow e pyrtuid ya ini i pyrchang da i pyrtuid ‘Clean Green Jowai Campaign’ kani ka Committee da jied ko ya 24 ngut ki dkhot kiwa kynthup ya ki kynthai wa chynrang na ki bynta waphær waphær yong ka chnong Jowai. Ka thong yong kani ka pynkhih toh wow pynkhooid yaka Ïawmusiang kawa man ka pyrdi chnong wa kam ka dur yong ka chnong Jowai. Nalor ini kiwi de ki thmu toh wow pynneh pynsah ya i khooid yong ka wah Myntdu kawa kær soodong yaka Jowai.

Kani man ko kam wow pynkhih mynsien (Campaign) neibynta waroh kiwa angnood wow pynman ya ka chnong Jowai kawa khooid wei da khut lang ya waroh wow embynta wow ya krehlang neibynta kani ka thmu. Neiliang yong kiwa pynlai ya kani ka pynkhih mynsien i angnood toh wow yoh yaka krehlang na waroh kiwa bynta ha Ïawmusiang kam ka yung krehkaam u DC Jowai, ka JHADC, ka Jowai Municipal Board, ka Dorbar Chnong Tympang Club, Ïawmusiang, kiwa pynlai yaka ki le tylli ki yaw, ka Ïaw Seiñ Raij Jowai, ka Ïaw Chor CNI wa ka Ïaw Chyiap ka Balang Presbyterian Church, Jowai wow ya krehlang ki neibynta ini i thmu.