Ki seiñbhalang wa kynthup ya ka KSU, FKJGP, HNYF, RBYF, JSU wa GSU da rai ki wow pynkhai im biang yei dawa wa sahteiñ yong ka jylla, khamtam yei pynkrehkaam ya ka Inner Line Permit (ILP), wei ha kini ki kajiak tayaw kini ki seiñbhalang da maham ki leh wow pynbna biang da ki yakhih neibhah wym chimkhia ka sorkar.
U President ka Federation of Khasi Jaiñtia and Garo People (FKJGP), u Wellbirth Rani da pynsñiaw u yei sñiaw diaw hajrong i wym ye ka sorkar jylla wow pynbor ya ka sorkar bei wow pynkrehkaam ya ka Inner Line Permit (ILP) hapoh Meghalaya.
Da ong u wa hanla waroh 60 ngut ki MLA hapoh ka yung dorbar chna aiñ da mynjur ki wow pynkrehkaam noh ya ka aiñ ILP hapoh ka jylla, tangwa iwa sñiawsih wa ini i kwah yong ki toh du ha Meghalaya tangwa manda lai ki cha Delhi ym jooh em klam ki hajrong ini tangwa da lai du wow lai paan Scheme lane paan poisa.
U Wellbirth da ong u wa khnang wa ini i rai wa da chim da ka dorbar chna aiñ ka jylla ym sepai ko, neiliang yong ki seiñbhalang leh da rai ki wow pynsawa biang ya kani ka phang hadien wa yachem biang ki wei daw pynbna da ki laad yakhih wow pynbor ya ka sorkar.
Ha iwi i liang uwa yahkhmat ka FKJGP da khana u wa ki seiñ da yaklam ki leh ya ka MRSSA wa katwa ym pu yoh ya ka ILP daw pynkrehkaam yow kdoh u khoom yei wan psiah kiwa na baar, wei ha itu i por da yakmen wei thap kti ki ya ka ‘Entry Point’ ha Umling tangwa sñiawsih won ki wow tip wa kani da pynman da ka thaw Test COVID-19 wei da pynrap u wa lada ini ym toh i chah thok chah chukor ki paidbah ha ka sorkar.
