Ka Sonapyrdi Tourism & Economic Development Society (STEDS) da pynsñiaw ko yei sñiawsih wa khroo yei nang joor i kylla rong ka wah Lukha na uwi u snem cha uwi, iwa da sdang nadooh u snem 2007 wei katni iwa sdang nadooh u Kmaichonglad (Dec), 2020 hadooh katni dang neh i.
Kamtæ da ong wa lada kamni, i thmu yong ka Society wow pynku ya ki kaam uiñke suwari daw sepai noh i. Heiwa ka wah Lukha jooh man ko ka wah kawa boon dakha bha nachwa kamjooh kawa khooid wow pynemkaam kawa katni ym em de kiwa kwah wow wan cha kani ka wah neidaw wa kylla rong wei ka wah leh da man ko kam ka phñiang charak.
Ka STEDS da ong ko leh wa kani ka wah em ko yaka Narpuh Wildlife Sanctuary, ki khloo kiwa rben wei ki mrad kiwa em hapoh yong kani ka khloo, ki dih um ki naka ha ki por wa nachwa tangwa katni hadooh ki mrad leh ym bien ki wow dih na kani ka wah.
Hajrong ini, ka Society ka kyrpaad ko ya ka sorkar jylla lyngba ka Environment Committee ka Assembly, kamjooh ya kiwi wow sñiawbha ki u booddien lang ya ini i chah pyntngit kani ka wah yow chem yeiwa sakhiat.
Da pynbna leh wa yaka Lukha Festival ha uni u snem ym pynman yaka neidaw wa em ka khlam COVID-19 deiwa kyrmen wa ha ki snem kiwa daw wan daw yohlaad biang wow pteiñ u pynman ya ka 3rd Lukha Festival.
