Shillong: Hei yatoh wa ka aiñ Central Motor Vehicle Act, 1988 kam chibynta wow pynsñiawthooh paidbah ya ki kyndon kani ka aiñ kamjooh yow man kiwa yah kari kiwa husiar, ki yungkrehkaam ki DTO waroh ki district deilang wa ka District Transport Officer (Enforcement) daw pyman ki ya ki sylli ya waroh kari (Sorkar wa kari samen).
Ki kyndon kani ka aiñ ka wow sylli toh ka Section 220 – kawa yatoh wei pyndait seatbelt, Section 129 – hei yatoh wa i sap helmet, Section 177 – kawa klam chaphang i pynemkaam mobile phone, i dih sikret wa kiwi kiwi, Section 185 – kawa khang yei yah kari dei muaid, Section 194 – i kit palatpood ya ki wa chong kari kamjooh leh ya ki mar, Section 181- i yah kari khlem license kamjooh khlem rah license, Section 192 – i yah kari khlem em number, Section 192 (A) – i yah kari khlem biang ki kot ki sla kam ki Permit wa kiwi kiwi, Section 196 – i pynemkaam kari khlem em Insurance wa kiwi kiwi de ki kot ki sla.
Kamtæ da kyrpaad ya waroh ki tre kari sorkar wa ki kari samen wow pynbiang ki ya ki kot ki sla heipor wa sylli ya ki kot ki sla yong ki.
Ini toh katkam i pyntip u Commissioner of Transport, Meghalaya, Shillong.
Discussion about this post