U Montri Rangbah ka jylla u Conrad K Sangma, uwa man leh u National President yong ka National Peoples’ Party (NPP) da kob u wa ka Party daw synchaar hi ko samen hadien wa da pynbna ya ka Result yong ka Election MLA kawa daw pynman ha u snem 2023.
U Conrad da ong u yeini hawa klam ha ka yalang yong ka NPP Pynthorumkhrah Block wei da pynbna leh ya u Rocky Hek kam u kyrtong ka seiñ na Pynthorumkhrah Constituency yow e reiñ ha ka Election MLA ha u 2023.
U Conrad da ong u wa ka saiñhima hapoh ka Meghalaya wa ka kyrdan yong kiwi ki seiñ saiñ pyrthai kitæ ha kini ki soo snem chiteiñ da yoh wow sakhi wa ka saiñhima da kylla chiboon ha Meghalaya. “Ha u snem 2018, i da chna i ya ka sorkar synrop wa da tip kam ka MDA deilang wa ki MLA na kiwi won ki seiñ saiñ pyrthai wei ha kini ki soo snem chiteiñ, ka sorkar yong i da kreh ko chiboon yow wanrah ka roi ka paar wei wow chim leh ya ki phang kiwa jwat kiwa ym pu em kiwi wa jooh chim wei kani da wanrah yei chaniah ha ki paidbah wa toh du ka NPP kawa ye wow yah chakhmat ya ka jylla Meghalaya ym da kiwi ki seiñ,” da ong u Conrad.
U Conrad da ong u leh wa du ka NPP kawa ye u chim ya ki phang wa jwat kawa kiwi won ki sorkar næ ki seiñ ha kine ki 50 snem wa da lai ym ye ki wow leh iyi iyi, wei toh lyngba ini da em i chaniah ha ki paidbah neibynta ka seiñ NPP.
Chooh chooh da ong wa kamwa man katni, na ki chnong na kylleiñ ki thaw nadooh na kdong na chmiang man-ka-sngi, kiwa yahkhmat, ki bru paidbah, ki MLA warim wa kiwa kwah wow yakhun MLA katni, ki em lut ki yei chaniah ha ka NPP wei lyngba ini, ka NPP da nang ku wei khlan wei ha kawi ka sngi daw man ka seiñ kawa khlan.
“Nga ym artatien wa lyngba i chaniah yong ki paidbah, nga tip O wa ha u snem 2023 manda mih ka Result, daw wan ka sorkar NPP wei ya kawa daw synchaar bait samen deiwa kyrchaan wei chaniah ki paidbah,” da ong u Conrad.
