Shillong: Ka Deputy Commissioner yong ka East Khasi Hills, ka Matsiewdor War Nongbri da kyntait ko wa em i tkoh i krehkaam ki bor pynlai District hawa yatoh wa i lai khawai hadooh 39 ngut du na East Khasi Hills ha Greenwood Resort kawa em ha Khanapara, Assam.
Katkam i ong yong ka DC, ki bor pynlai District da e Pass ki du ya 5 tylli ki kari wa neibynta 5 ngut ki bru, tangwa ym tip ko wa ki bru kiwa lai u em ki da ki phaw ngut, deiwa ong wow pynbaad du ya ki bor pynlai District ym man neibhah kiwa lai cha katai ka khawai bia wa ym toh du na kawi ka District.
Hawa kylli da pyntip ko wa ynne ka sngi daw ujor noh pyrchah ya kiwa dang sah, wei i slem wow ujor ya kiwi toh neidaw wa pynman biang yaka takit ha chwa wow lai chakhmat i ujor, wei katkam i pyntip ka DC, da em sa 4 ngut ki bru wow chah ujor myntu ka sngi ha ka yung krehkaam u Superintendent of Police.
Hawa kylli chooh chooh, ka Deputy Commissioner da kyntait ko wow pyntip iyi iyi, wei ya ki pyrtuid yong kitu ki bru leh da ong ko wa daw pyntip hadien wa da dep wow ujor.
Kam wow kdaw wa rap nachwa da mih wa em 41 ngut kiwa lai cha ka khawai bia ha Khanapara, tangwa hadien wa ka sorkar da thung ko yaka kynhun wow takit, da chem wa em 47 ngut kiwa lai cha katai ka khawai, wa kynthup ya 39 ngut na East Khasi Hills katwa 8 ngut toh kiwa na Ri Bhoi District.
