Hadien wa yoh bor na ki bor pynlai District yong ka West Jaiñtia Hills District wow wai biang ya ka Iaw Thymblein, ka Dorbar Chnong Khanduli da rai ko wow sdang biang ya ka die ka thied ka khayi ka pateiñ ha katai ka yaw nadooh ka 01-10-21.
Kam wow pynkynmoo wa ya ka Iaw Thymblein kawa jooh man ha ka chnong Khanduli da chah khang nadooh u Naitung (Apr) uni u snem neidaw ka khlam COVID-19 wei itai i khang da ktah ko chiboon yei yoh i kot yong kiwa boon walang kiwa dai wa thied wow im jakpoh na katai ka yaw.
Ki bor pynlai District da e laad ki wow wai biang ya katai ka yaw hadien wa da ood da naam ka Dorbar Chnong Khanduli wei katkam i ebor, da phah ya kiwa dai wa thied wow deiñ ya ki Mask wa ar-rtap kam ka laad yada na ka khlam COVID-19.
Chooh chooh hawa bood ryntih ya ki kyndon e bor, ka Dorbar Chnong da maham ko ya kiwa chong dai ha ki luti lai kjat lai kari wa ym toh u pynkhynnia ya ka yaw ka haat.
Ka Dorbar Chnong da kyntu ko leh ya kiwa dai wa kiwa thied wa toh u pyniajngai uwi na uwi katkam ka kyndon ka Social Distancing wei katkam wa phah da ki bor wa haneiñ.
Ka Dorbar Chnong daw booh ko leh ya ki Volunteer yong ka wow pyntikna wa bood ryntih ya kitai ki kyndon khnang wow yada na ka khlam COVID-19 kawa da e u wanrah biang ya i khang lada wan joor biang ko.
