Jowai: Ka Diocese Jowai daw wai ko sa kawi ka Parish ha Iongshiwiat ha kani ka 18 uni u bnai ka wow man ka Parish kawa 18 yong ka Diocese Jowai da pyntip u Most. Rev Victor Lyngdoh, Bishop ka Diocese Jowai.
Ya kani ka Parish Iongshiwiat da ekti hapoh i pynlai yong ki Phadar na ka yasyllok Society of Divine Word, heiwa u Phadar Antony Manoj u man u u Parish Priest uwa nyngkong yong kani ka Parish. Ya ka lehniam wai ya kani ka Parish wa i pynkhamti hapoh i pait yong ki Phadar Society of Divine Word, u pyndep ha i por knia Mass wa khooid ka wow sdang ha i por 10 waje i step ka wow yahkhmat da u Most Rev. Victor Lyngdoh hei synran ki Phadar kiwa wan na ki Parish waphær waphær yong ka Diocese Jowai wa nabaar.
Neiliang ka Organizing Committee kawa toh u pynlai ya kani ka yalang wai Parish wa thymme ha Iongshiwiat, da khut da wer ya ki parakristan na ki Parish waphær waphær yong ka Diocese Jowai wa na ka Archdiocese Shillong wow yawan chongchit wow ya sakhilang ya kani ka wai Parish Iongshiwiat. Ha i por 1:30 i sngi daw sdang yaka yaseiñ nohsngi, ka mane Sacrament wei u bood sa ka leh burom ya ki Lyngdoh ki wow chimkti ya kani ka Parish kawa thymme.
Ka chnong Iongshiwiat jngai ko kamwa 30 Km na Jowai. U surok uwa bha uwa ym em i wit ya ki kari khian wa ya ki kari heh wow lai yow poi cha Iongshiwiat. Ya ki kari kiwa wan na Arch Diocese Shillong wow poi cha Iongshiwiat, ki hap lai ki lyngba ka chnong Ummulong-Wahiajer-Nartiang kawa jngai kamwa 26 Km na Ummulong wei ya ki kari kiwa wan na ka Parish Mowkyndeng, Sahsniang, Phramer, Sutnga, Jalaphet, Khliehriat, Lumshnong, Umkiang, Ladlakadong wa Ladrymbai ye ki u lai na sarok 4 Mer Nangbah-Nartiang kawa jngai kamwa 30 Km na 4 Mer cha Iongshiwiat katwa ya ki kari wa na Parish Amlarem wa Parish Jowai ye ki u lai na u sarok Ummulong lane na u sarok 4 Mer Nangbah-Nartiang.
Ha i jooh i por u Most. Rev. Victor Lyngdoh, Bishop ka Diocese Jowai ha ka pynlait khubor da kyntu joor u ya ki paaid Kristan na ki Parish waphær waphær yong ka Diocese wow yawan chongchit yow pynkhroo ya kani ka sngi heiwa ka Diocese da ye ko wow wai sa kawi ka Parish kawa man ka Parish wa 18 yong ka Diocese Jowai.
Discussion about this post