Jowai: U montri rangbah ka jylla, u Conrad K. Sangma chirup wa u Advocate General ka jylla, u Amit Kumar ynne da yachem u ya u montri ka sorkar pyrdi wa pait ya u mooyong, u Piyush Goyal wow yaklam chaphang i kaam tih mooyong hapoh jylla.
U Conrad wa u Amit da yachem ki leh ya ki sahep na ka Ministry of Coal heiwa da emlang u Additional Secretary wa u Joint Secretary, Ministry of Coal.
“Da yaklam wow sdang biang ya i kaam tih mooyong heiwa ka Ministry da kyntu ko ya i wow pynkhreh ya ki aiñ i rukom tih mooyong ka wow pynkhreh da ka sorkar jylla wei ki heh yong ka Ministry leh daw wan ki cha ka jylla heiyatoh wa ini i kaam”, da ong u Conrad.
Heijooh i por u Conrad da ong u wa neiliang ka sorkar pyrdi da kular ko wow e yarap iwa pura cha ka jylla wow sdang biang ya kani ka kaam.
Wa kani ka kynti u Conrad da yachem u wa u Piyush Goyal la le sien ha kini ki ar bnai wa dadep.
Kam wow pynkynmoo heini u Lber Laloo uwa na Panaliar, Jowai da yaleh mukotduma u haka Supreme Court nadooh 25 Duyatra uni u snem pyrchah yei khang ka NGT yei khih mooyong hapoh ka jylla Meghalaya wei neiliang ka yung bichaar da hukum ko ya ka sorkar pyrdi wow booddien yeini chwa wow chong bichaar biang ko ha ka 30 Naiynñiaw uni u snem.
Discussion about this post