Kam chibynta i lehkmen yei dap 75 snem i yoh laitlooid ka ri India, ka Ministry of Women & Child Development daw leh ko ya kiwa boon ki kaam neibynta ki kynthai wa ki khynnah. Kini toh hajrong ka phang pyrdi yong uni u snem kawa ong ‘Children Ideas, Rights & Nutrition’ kawa daw leh nadooh ka 14 tarik hadooh 21 tarik uni u bnai.
Ha kini ki sngi daw pynman ya ki yalang ha ki Child Care Institutions (CCIs) wa ki Specialised Adoption Agencies, ki pynsñiawthooh paidbah hajrong i leh ‘Adoption’, ki Seminars/Webinars heiyatoh waka aiñ, i chait i khiah kiwa dang khai khynroo, i hok ki khynnah wa kiwi kiwi de. I thong toh wa ha kani ka chi tayaw daw ye u pynsñiawthooh chaphang yei hok ki khynnah wei wow katik yei pyrkhat kiwa boon wa lang heiyatoh wa ini waroh.
Ynni ka 14 tarik kawa man leh kam ka Children’s Day, ka Ministry da sdang ko ya ini da ki yalang ha kiwa boon ki Child Care Institution heiwa neiliang ka Montri ka Women and Child Development, ka Smriti Zubin Irani da chimbynta ko ha ka yalang pynkup burom wa pynman da ka National Legal Services Authority hajrong ka ‘Pan India Legal Awareness & Outreach Campaign’ kawa pynlai da u CJI N.V. Ramana, kawa da pynman kam chibynta ka Amrit Mahotsav yow pynsñiawthooh paidbah hajrong ki aiñ.
Ka Montri hawa pynsñiaw yei sñiawngooh ya ka NALSA wa da kreh ko neibynbta i hok ki khynnah yow heh u san wei yow yoh ki yei yada. Da khana ko leh wa deiwa ya krehlang lyngba ka SAMVAD waka NIMHANS, da em palat 1 lak ngut kiwa da yoh sikai kammoh wow yarap ya ki khynnah kiwa chitom neidaw wa joor hap ki u bahkhlieh hei im yong ki. Ha kani ka tayaw daw lai cha ki 17 tylli ki Child Care Institutions kiwa em ha UP, Bihar, Rajasthan, Haryana, Karnataka, Tamil Nadu, Assam, Meghalaya wa Manipur. Ha kini ki thaw daw pynyoo phlim ya ki khynnah heiyatoh wa ki parom ka India wa ki khlawait ka ri, ki chaad tynre, i yahke cha ki National Museum, ki khana parom heiyatoh wa kiwa yahkhmat ka India, ki kaam wa yatoh waka rymaw wa kiwi kiwi de.
