Uwa rwai wa pawnaam ka USA uwa tip kam u Ne-Yo daw wan pynchit u ya ka Shillong Cherry Blossom Festival 2023 deilang wa kiwi kiwa na baar ri kam u Ronan Keating, Jonas Blue, ki Hybrid Theory wa u Kenny Music.
Ya kani ka tamasa ha uni u snem daw pynman ha RBDSA Sports Complex wa em ha Bhoirymbong, Ri-Bhoi District kawa daw pynman ha ka 17, 18 wa 19 tarik u Khonchonglad (Nov) heiwa da antaad wow poi hadooh 1 lak ngut ki bru ha kini ki le sngi.
Neiliang u Montri ka chnat Tourism, u Paul Lyngdoh da ong u wa da yooluti wow poi 30,000 ngut ki bru ha ka chi sngi wei kamwa 90% na kini u man ki kiwa uiñke suwari kiwa na baar jylla wei kamjooh na baar ri iwa daw pyn pawnaam ya ka jylla.
Da ong u leh wa ka Meghalaya daw pynlut ko Rs. 1.99 klur na ka Rs. 9 klur wa emkaam yow ye u pynman ya kani ka tamasa kawa pawnaam ka Meghalaya.
Chooh chooh da pyntip u leh wa kiwa rwai wa tem ka jylla leh daw yoh ki wow chimbynta lang ha kani ka jooh ka rynsan deilang wa kiwi kiwa pawnaam kiwa na baar ri kam u Ne-Yo, Ronan Keating, Sanam, Jonas Blue, SURL, Pink Panda, Kenny Musik wei kiwa napoh ka jylla kiwa daw rwai daw tem toh ka Meba Ofilia, u Lou Majaw, ki Blue Temptation, Snow White , Street Stories, 4th Element, Nokpante wa kiwi kiwa boon, wei ki paidbah leh daw yoh ki wow chibynta ha kiwa boon ki jait yalehke wa ki yakob rwai (Karaoke) wa kiwi kiwi de.
Da pyntip u leh wa daw em ka Miss wa Mr. Cherry Blossom Pageant, ka yakob rwai Choir wei daw pyndait leh ya ki Zip Line, daw booh leh ki thaw yalehke ya ki khynnah wa kiwi kiwi yow man kini ki 3 sngi kiwa sah kynmoo.
Discussion about this post