Hei sien wa nyngong kiwa tem wa rwai kiwa na ka ri Switzerland kiwa tip kam ki Burning Witches daw wan tem ki ha Syntu Ksiar, Jowai kam chibynta ka Rock With Us- Open Air Festival kawa daw pynman ar sngi ha ka 29 wa 30 tarik uni u bnai November.
Kani ka tamasa toh kawa daw sdang heipor 4:00 waje i janmiet ha waroh ar sngi.
Ka bai psiah ha ka sngi nyngkong u man ko Rs. 500 wei wa kani da yoh mynkna kawi ka Card yaleh Housie wa chongdor Rs. 500 heiwa ha kani ka sngi ka House man ko Rs. 1,00,000 wa ki Line kiwa Rs. 5000 uwi. Lada kwah wow thied Card chooh najrong kawa da e mynkna da man ko Rs. 500 kawi.
Ha ka sngi wa ar ka bai psiah u man ko Rs. 1000 wa kynthup leh ya kawi ka Card yaleh Housie kawa chongdor Rs. 700 wei ka House ha kani ka sngi man ko Rs. 3,00,000 wei ki Line won mar Rs. 10,000 uwi. Kiwa kwah u thied Card najrong kani kawa da e mynkna u man ko Rs. 700 kawi.
Kiwa tem ha ka sngi nyngkong katæ ka 29 tarik toh ki Metallica Tribute Band kiwa na Maharashtra, ki The Lynx, ki Grassroot, ki Arch Angel, ki F.E.A.R, ki Rebel Riffs wa ka DJ Jelly.
Ha ka sngi wa ar katæ ka 30 tarik, daw tem ki Burning Witches kiwa na Switzerland, u Nishang Hagier, ka Gracyl Ropmay, ki Magnificent Obsession, ki Toxic Pony, ki Linkin Park Tribute Band kiwa na Pune wa ki Thunder’s Cave.
Kamtæ da khut sñiawbha ya phi ki paidbah wow wan pynchit phi ya kani ka tamasa kawa rap phær.
Discussion about this post