Shillong: U montri khynnah ka sorkar pyrdi wa pait ya ka chnat Social Justice & Empowerment, u Ramdas Athawale daw wan yoohkjat u ha nongbah Shillong wow ap yei eh ki seiñ waphær waphær wa kynthup leh ya kiwa sikai ha ka jylla wa ki wakreh ka GVK EMRI,108.
U Ramdas Athawale da kular u wow wan cha kani ka nongbah ha ki seiñ na ka jylla Meghalaya kiwa da lai wow pynsñiaw ki yei eh hakhmat u montri ha nongbah Guwahati, Assam ha kani ka sngi chohthat wa da dep. Kiwa lai yachem na kani ka jylla kiwa lai wow yachem ya u Athawale kynthup ki ya kiwa sikai hapoh i yahkhmat u Kenneth Shadap uwa man u President ka Meghalaya Upper Primary School Teacher’s Association (MUPSTA) uwa man leh ha i jooh i por u General Secretary ka JACATAM.
Ha kani ka yachem wa u montri, neiliang u Kenneth da pynsñiaw u yei eh wa kiwa sikai yahcem ki hapoh ka jylla wei ha i jooh por da e kti leh ya ka chithi sñiawngooh cha u montri wa da yarap u wow tuklar lang ya ka kaam kiwa sikai wa ka sorkar jylla wow tipmit noh ya ki skur Adhoc cha ka Deficit System wei leh i rukom su tulop katkam ka kaam.
“Ya ini i tuklar yong u montri, i kiwa sikai i dang yang sa du ka jubab na ka sorkar jylla. Ha kani ka yachem da pynkynmoo biang leh ya u montri ya kini ki jooh khnang wa ka kaam ym suki ware,” da ong u Shadap.
Ha ka jooh ka por da pyntip wa neiliang u montri da kular u leh wa da yaklam u wa u montri rangbah, u Conrad K Sangma hawa yathoh wa kani ka kaam.
“U montri da kular u leh wow wan cha ka jylla ha ki bnai wow wan yow pynbait ya waroh ki eh wa kiwa sikai yachem ki,” da pyntip uwa yahkhmat kiwa sikai.
Ha kani ka sngi neiliang ki wakreh ka GVK, EMRI 108 hapoh ka Meghalaya EMRI Worker’s Union (MEMRIWU) leh da yachem ki wa u Athawale wow pynsñiaw yei eh neidaw wa ym mano ki bor pynlai ya i dawa ki wakreh.
Discussion about this post