Ka Executive Committee yong ka Khasi Hills Autonomous District Council (KHADC) da rai ko wow chna aiñ noh neibynta wow pynyoh bhah lang kamjooh ya ki khon Khasi wa pura, wei ya kani ka aiñ ka KHADC daw wanrah ha ka Dorbar kawa daw man ha ka 8 tarik uni u Khonchonglad (Nov).
Hawa klam hadien ka yalang, u Chief Executive Member ka KHADC, u Titosstarwell Chyne da ong u wa ka Council daw wanrah ko ya ka Khasi Hills Autonomous District (Khasi Inheritance of Property) Bill, 2021, wei ini wa ka KHADC daw wanrah ko toh ha i rukom yoh pateiñ wa i yoh i em yong ki bei ki pa, wei kani ka aiñ da wanrah khnang wow yarap neibynta kitu kiwa em du ki khon chynrang wa ki wym em khon.
U Titos da ong u wa i mih chiboon ki kynrum kynram hawa yatoh i yoh pateiñ, heiwa da em leh boonsien wa chi yung chi sem da mih wow yaleh mukotduma neibynta wow yoh pateiñ, wei kini kiyi kiyi da pynman ya ka Council wow wanrah da ka aiñ neibynta wow kdoh u khoom yow bha, yow biang lang, khlem da leh chiliang ya ki khon kynthai næ chynrang, tangwa da pyntip leh wa ha kani ka Bill da e laad leh ha i mon ki bei ki pa yow e bhah ya kiwa hiar pateiñ.
Chooh chooh u CEM da ong u wa kani ka aiñ daw khanglaad yei yoh bhah lada em ki khon kynthai næ chynrang kiwa tam sneiñ næ kiwa yaleh pyrchah ya ki bei ki pa, yow khanglaad leh ya ki khon kynthai kiwa yoh kurim da kiwi ki jaitbru wei kiwa lai bood ya ki riti dustur yong kiwi ki jaitbru, heiwa kam kini ki khon ym em hok de wow yoh yei bhah ki bei ki pa.
U Titos da ong u leh wa katkam ka dustur ki Khasi, boonsien da jooh chem wa ya ka pateiñ næ ka nong ki bei ki pa da yoh da ka khon khaddooh, katwa ki khon nyngkong, ki khon pyrdi leh sumaar ki ya ki bei ki pa, wei ini ym yahaap wa kammon u yoh du ka khon khaddooh. Da ong chooh chooh wa em ki khon chynrang kiwa sñiaw wa ha yung bei yung pa ym yoh iyi iyi, wei lyngba kani ka aiñ, ki khon chynrang leh daw yoh bhah yei em yong ki bei ki kpa, wei da ong wa ki leh ye ki wow pynemkaam hawa paan ram na ki Bank neibynta wow yoh laad wow seiñ kaam yong idæ wa kamtæ ter-ter.
