Kam chibynta wow pyntikna wa daw ye wow yada yaki paidbah na u khñiang COVID-19 ha Meghalaya, ka sorkar jylla da pynkhreh ko wow wanrah yaki kyndon namo ki Protocol thymme neibynta kini ki por ka samoi lehkmen.
“Deiwa pyrkhat wa ka samoi lehkmen da sdang ko, emkaam wow wanrah yaki kyndon yow pyntikna wa ki paidbah man ki kiwa yada pyn ya ki hi wei wym toh u kheiñstiñ næ tyndep yaki kyndon yada,” da ong u Montri Rangbah ka jylla u Conrad Sangma ynnin ka sngi hadien ka yalang wa yaklam chaphang i long i man ka khlam hapoh ka jylla.
Da ong u leh wa ka sorkar daw yaklam chwa ko wa kiwa boon heiyatoh wa ini.
“Ki Deputy Commissioner daw phah yaki wow pynman yaka yalang wa kiwa boon kiwa daw embynta ha kani ka kaam wei hap pyntip won ki cha ka sorkar hapoh chi tayaw yow ye u wanrah yaki kyndon wa hap u bood ha kini ki por ka samoi lehkmen,” da ong u.
Deiwa kyrpaad ya kiwa chnong wow bood yaki kyndon manda pynmih ya ki, u Sangma da ong u, “I por Christmas toh i por wa i waroh em i ya i mynsein wow lehkmen. Na da kyrpaad O wa ha waroh iwa leh i toh u kynmoo wow man ki bru wa ryntih deiwa bood yaki kyndon wei wow kynmoo kammon wow yada.”
Da ong u leh wa da em i sdang duna kiwa yoh COVID-19 hapoh ka jylla tangwa ym em mut wa hap noh wow mylliñ yaki kyndon.
Hawa kylli won yei yoh ya i dawai yada na u COVID-19 namo i Vaccine, u Sangma da ong u wa u Prime Minister ini wa dep da phah u ya waroh ki jylla wow pynkreh ki ya iwa emkaam yow ye u e ya ini i dawai manda mynjur wei da e bor wow e ya ini i dawai.
Heiyatoh wa i e ya ini i Vaccine hapoh ka jylla, da ong u wa nyngkong u e ya ki wakreh Health wa kiwi kiwa em hakhmat dooh wow yaleh pyrchah ya uni u khñiang kam chibynta ka bhah wa nyngkong, wei ka jylla da pynkhreh ko wow leh ya ini heiwa ya i Inject toh iwa hap e arsien iwa ym pu em pyntip bniah ya ini.
