Ka seiñ Trained Psychotherapeutic Professionals of Meghalaya (TPPM) da thoh ko cha u Montri wa pait ya ka chnat puræ puthi, u Lakmen Rymbui heiyatoh wa i long i man i rukam e sikai hapoh ka jylla Meghalaya.
Ha iwa da tyrwa cha u Montri, da ong wa ini toh iwa da e hadien wa da dep yaklam wa kiwa sikai, ki bei, ki pa wa kiwa dang lai puræ ha kiwa boon ki bynta ka jylla wei i yaklam wa ki toh ha kini ki bnai wa da dep wei da yooluti ki wa u Montri u pdiang u ya ini wa da tyrwa.
Da ong wa katwa ye, toh u pynman yei long i man iwa chngaaiñ ya ki khynnah ha kini ki por wa em ka khlam.
Da chem ka TPPM leh wa i e sikai Online ym toh iwa krehkaam khamtam cha ki thaw wa em i thut ka Network. Wei da chem leh wa kiwa boon ki manyung toh kiwa ym ye wow pyndap yow leh ya ka Online Class na ki daw wa boon nadooh wym ye u thied ya ki tiar wa syad (Hi-tech Gadgets) kamjooh wow thied Internet man-u-bnai.
Da kdaw leh wa kitu ki yung wa em boon ngut ki khon da chem chitom ki wow pynbiang Phone ya waroh wei ka Internet toh kawa da booh kyndon kattu katni donhi chi sngi wa ye u pynemkaam deiwa smat i bor ko, wei manda kut iwa da booh, suki wot i bor smat ka Internet.
Sa iwi wa chem chitom kiwa pynemkaam da ki Phone toh wa khian ka Screen ki Phone kamjooh i sur leh toh i wym che bha kamjooh leh i dur iwa da ktah leh yei khmat ki khynnah wa pynemkaam. Kamtæ ki bei, ki pa kamjooh ki khynnah da ong ki wa da yooluti wa ka sorkar toh u e ki da ki Laptop.
Ha ki thaw palat sor da ong wa toh u chah u lai skur 10 ngut ki khynnah chisien chi tayaw yow yoh ki yei pynche na kiwa sikai.
Chooh chooh da ong wa ini toh i laad wow pynkylla noh yei rukom e sikai iwa da chem wa da boon snem ym toh i wym krehkaam wei wow pynlut por deiwa e sikai deiwa pynpliah ya i sap wa da em chwa ha ki khynnah.
Da pynkut deiwa ong wa ha kam kini ki por lada pynslem wow leh smat iyi iyi, daw wiar leh i kwah ki khynnah wow lai skur iwa daw ktah ya ka mynried yong ki hadien wa kut ka khlam.
