Shillong: Ka All Meghalaya Commercial Vehicle Owners and Drivers Union (AMCVODU) ha ka 1 tarik u Thohlakhmi (Feb) daw pynman ko yaka yalang bah ha Lad Smit wow yaklam yei eh wa kiwa yah kari kamai kiwa na kani ka jylla da yachem ki. Wei kamjooh i pynku ya ka bai sarok ka Toll Gate kawa em ha Umling khlem iwon iwon i pyntip.
Hawa klam ynne ka sngi, u Egenstar Kurkalang uwa man u President ka AMCVODU da ong u wa i yoh kamai laitlan yong ki kari wa na baar jylla khamtam na Assam wa West Bengal da ktah ko yaka kamai kajih yong ki tre chnong kiwa im sngi da i kamai kari lada man ki taxi næ ki kari tourist neibhah ym em ki kyndon ki wow kdoh u khoom ya kini ki kari wa na baar jylla.
Da ong u wa ha katai ka yalang, ka Union daw yatai sani wow thooh ki laad neibynta wow kyntu ya ka sorkar wow pait ya kani ka kaam kamwa leh ha Sikkim wow khang ya ki kari wow lai ki kat cha wa em ki kdong ki chmiang wa cha ki thaw uiñke.
Da ong u wa ha kani ka yalang bah kiwa yah kari daw man ko hajrong i chim bai sarok palat pood yong ka NHAI ha ka sarokbah Shillong-Guwahati, heiwa da ong u wa khlem pyntip ya i dawa ka Toll Gate kawa em ha Umling, Ri-Bhoi District da pynku syndet ya ka bai sarok na ka T.80 cha ka T.110 kawa da ktah chiboon ya ki paidbah wei kamjooh ya ki kari kamai.
Chooh chooh da ong wa manda poi ha katai ka Toll Gate kiwa yah kari da hap ki wow yang hadooh chiteiñ kynta ha u laiñ wow su bai sarok. Da ong leh wa ka Union daw kyntu ya ka sorkar wow booh noh ya ka por wow chah pynyang deiwa pyntip wa ha Punjab wa Karnataka toh u pyndep du hapoh 3 minit, lym kamtæ ki kari lai bait ki khlem emkaam su.
Discussion about this post