U MLA ka BJP na Pynthorumkhrah uwa man leh u Montri ka sorkar jylla, u AL Hek da pyntikna u wa u Montri ki Kaam Pohyung ka ri India, u Amit Shah daw wan u cha Shillong ha ka 23 tarik uni u bnai wow chimbynta ha ka Plenary Meeting yong ka North Eastern Council (NEC) neibhah wa man u kam u Chairman ka NEC.
Hawa kylli, da ong u wa ka sorkar daw yaklam ko wa u Amit Shah ya kiwa bon tylli ki kaam, kiwa kynthup ya ka Inner Line Permit (ILP) wa kamjooh leh i klam yasuk wa ka Hynniewtrep National Liberation Council (HNLC).
Da ong u wa i wan u Amit Shah cha ka Meghalaya toh du neibynta ki kaam wa yatoh wa ka NEC, tangwa lada ka Party yohlaad ko wow yaklam wa uni u heh ka BJP toh wow pynkhlan ya ka Party neibynta ka Election 2023.
Chooh chooh u Hek da ong u wa i pynbna pynkrehkaam ya ka ILP ha Meghalaya ymtoh i rai yong u Montri samen, tangwa lada ka yung krehkaam ka MHA sñiaw ko wa da biang wow pynkrehkaam ya ka ILP ha Meghalaya daw pynbna yeini.
Kamwa da sakhi ha ki por wa dadep, ki seiñbhalang joooh mih ki wow pynsñiaw yei dawa hawa wan ki Montri ka sorkar pyrdi deiwa rah ya ki kot rben wa thoh ya ki kyntien, wei boi ha kani ka kynti leh ye wow em ki seiñbhalang wow mih wow dawa ya ka ILP. Hajrong ini, u Hek da ong u wa ki seiñbhalang em ki ka bynta wow lai chaphrang wei ka sorkar leh em ko ki bynta yong ka hi.
U Hek da ong u leh wa chong ha i stat yong u Montri Rangbah wow yah ya ki MLA wow yachem wei lada kamtæ oo man u uwa smat.
