Kam chibynta i pynkhreh ya ka 6th Meghalaya Games ka wow man ha Jowai, West Jaiñtia Hills District ha u snem 2025, ynne ka sngi u Montri ka chnat Sport & Youths Affairs ka sorkar jylla, u Shakliar Warjri chirup u MLA ka Jowai, u Wailadmiki Shylla, ki dkhot ka Meghalaya State Olympic Association, ka State Sports Council wa ki bor District ka West Jaiñtia da pynman ki i yachem lang wa ki sahep yong ki chnat krehkaam sorkar waphær waphær ka District neibynta u ya phyllu hajrong kammon u pynman ya kani ka lympung yalehke kawa jop wei kawa e myntoi sakhiat ya ki khon khynroo khyllood kiwa em yei sap yalehke waphær waphær.
Hei yaklam wa u Montri hadien ka yalang wa da pynman ha Conference Hall ka ka chnat Soil and Water Conservation Jowai, da khana u wa kawi na i chna wow wanrah ha ka District toh ka Swimming Pool, katwa neibynta kiwi won ki jait yalehke daw chna pynbha pynmiat ha ki thaw wa da em chwa kiwa dadep jied.
Ong haroh u wa i wan kani ka Meghalaya Games daw man i myntoi ya ki skur ki College neibhah wa ya ki thaw wa da jied u pynman ki jait yalehke daw pynbiang pyntoh ya ki. Iwa mut hadien wa kut ka yalehke daw man i myntoi i yoh nong ya ki hi neibhah daw yoh ki u pynemkam ki.
Heiyatoh won wa i duna wa da jia haka Meghalaya Games ini wa dep, ong u wa yeini da chim kam iwa da chem wow ye u pynbha chakhmat.
Neitæ hawa kyruiñ won cha ki thaw sah ong u wa ka West Jaiñtia Hills toh kawa da biang tam neibhah em ko boon ki skur, ki College wa ki Guest House nadooh yong ki bru samen wa yong ka sorkar.
Chooh chooh u Montri khana u wa ha ka Meghalaya Games wow wan daw kynthup iwi næ ar jait ki jait yalehke neibynta kiba duna hei doh i pran, neibhah wa kwah ya ki leh u yoh bynta lang ki ha ka Meghalaya Games.
Discussion about this post