Ka HYC Sohiong Circle da thoh ko cha u CEM ka KHADC yow chna noh da ka aiñ Poikha Poiman yow pynkhlan ya ka riti chongkha ka jaitbru kawa da myllien da u warim wajah khang wa kani ka dustur u man noh ko kam ka aiñ.
Da ong wa katkam ka dustur riti- ki arliang kur, ki arliang kni da em ki ka bynta wa khroo kamwa da booh bynta da ki longchwa manchwa yow rai lane wow thaw, wow woh ya i bit i biang ka poikha poiman.
Wei kamwa man katni kani ka riti da synjor ko neidaw wa mylliñ u bood ya ka riti poikha wa kiwi ki jaitbru kamtæ emkaam wow pynskem wei pynkhlan yow tip che katkam ka luti yong ka aiñ.
Da kdaw wa ya ki District Council (KHADC) da chna neibynta wow pynneh kyrpang ya ka riti dustur yong ka jaitbru Khasi wei da man i kaamram yong ka Council wow pynskem ya iwa da leh nadooh nachwa da ka luti yong ka aiñ kamwa da e bor hapoh ka riti synchaar ka ri India.
Da ong wa kattu la 69 snem tam da em ki Autonomous Council tangwa hadooh katni ym pu em thoh (Codify) ya ka riti poikha chongkha yong ka jaitbru Khasi yong i kawa man kawi na ki riti wa emkaam bha.
Kamtæ da kyrpaad ya u CEM wow chna noh ka aiñ yow pynneh ya ka dustur riti poikha chongkha kamwa da jooh leh nadooh nachwa.
