Ka seiñ JSU ynne ka sngi da yachem ko wa u Montri ka chnat Arts and Culture ka sorkar jylla u Sanbor Shullai heiwa da e ko ya ka dorkhat wow dawa wow chna pynmiat noh ya ka District Library waka Auditorium ha Jowai neibhah wa da sih da jæd da pra ko heiwa da dawa wow chna pynmiat ya ka kam kawa ha Tura heiwa neiliang u Montri da kular u wow leh yeiwa emkaam lada biang ka poisa.
Ka JSU da dawa ko leh na ka sorkar wow booh kawi ka District Library wa Auditorium ha East Jaiñtia Hills ha Khliehriat neibhah hadooh katni ki paidbah wa ki chnat sorkar chem chitom ki wow pynman ya ki yalang neidaw wym em kam kani ka thaw kamjooh yow yoh myntoi ki khynnah wow puræ kot.
Ka seiñ da daw ko leh na u Montri wow chimkhia ya ka Amphitheatre wa em ha Police Reserve Salini Colony yow yoh ki paidbah u pynemkaam ka yow pynman ya ki tamasa neibhah kani toh kawa da dep chna tangwa katni da man ko kam ka yung kawa chah ieh hi-eh.
Hajrong ini neiliang u Montri da pyntip u wa da yaklam u wa u In-charge ka District Library Jowai wei da phah u ya oo wow leh yeiwa emkaam wei ye u wow wan pait ya ini i Amphitheatre boi sah i khlem kreh.
Da dawa leh wow booh ya u mot u Kiang Nangbah ha Kiang Nangbah Government College neibhah ym em iwon iwon wow pynsahnaam ya uni u khlawait ka ri wei lada ym booh hapoh ka College toh u booh hei thaw wow psiah chapoh ka College heiwa u Montri da ong u wa ye wow booh leh hei thaw ka chnat Transport wa em hajan ka College.
