Dawa hiar chuki ka liang pyrchah ka JHADC ya u CEM

Jowai: Ka liang pyrchah ha ka dorbar JHADC ynne ka sngi hadien wa da pynkut noh ya ka Dorbar Tlang ka Council khlem yaklam hajrong kawon kawon ka phang da dawa ko ya u CEM, u Thombor Shiwat wow hiar noh u na kani ka chuki.

Hawa yaklam wa kiwa pathai khubor hadien wa pynkut ya ka dorbar, ki MDC ka liang Pyrchah da pynsñiaw ki yei diaw mynsien hajrong i man i long ka Council hapoh i pynlai kani ka Executive Committee, u Thombor Shiwat.

U Lakhon Biam da ong u wa kani ka Dorbar man ko kawa sepai neidaw wa ka liang pyrchah da pynkhreh ko wow wanrah yaklam hajrong kiwa boon ki phang kam ka kaam mooyong wa ka MMDR Act, ka poisa poilaiñ ka Council wa kiwi kiwi.

Da beiñ u leh ya ka EC wa katni neibhah wa man ko kawa tlot heiwa da thmu ko wow wanrah yaklam du hajrong ka phang wa yatoh wa i pynkylla ya ka Sixth Schedule ka riti synchaar ka ri wa kiwi ki bui (report) krehkaam ka Council.

Related posts

Pyndem u Teibor hei mon ki paidbah, pynbna u wow yakhun MDC kam u kyrtong samen

January 4, 2025

Pynbna u MP wa chah kset hapoh patok wow sdang u da ka Political Party

January 2, 2025

Chooh chooh da kylli u leh wa neiyi i daw wa kani ka EC wa katni ym leh ko iwon iwon hajrong ka tulop ki wakreh ka Council kawa da sah da kamwa 5-6 bnai kattu.

Neiliang u Andrew Shullai da ong u wa kani ka EC wa katni man ko kawa pynsarom ya ka Council wei katkam wa man katni ymtip de yei rukom pynlai pynwan ya ka kaam poisa ka Council.

U Dawan Lyngdoh da beiñ u yei kheiñstiñ ka EC hajrong ki kaam wa toh u leh ko khamtam ha ki thaaiñ khappood wa ka Assam, u Treilang Suchiang won da beiñ u ya ka Council hajrong ki kaam wa yatoh wa wan khayi laitlooid ki baar jylla hapoh u pood ka Council.

U Krison Langstang da kylli u wa iyi leh ka Council hajrong ka Khliehriat Town Committee heiwa ki wakreh kattu la kamwa 2 snem ym em u yoh tulop wei ka yung krehkaam kani ka Committee kawa ar mala da ieh hi-eh ya ka katwa kamtæ da toh u e rai ko lada u pynim namo u pyndooh noh ya ka (Committee).

Neiliang u Holando Lamin da ong u wa kani ka EC man ko kawa tlot tam neibhah wa i kreh ha ka Iawmusiang iwa da man i angnood ki paidbah ka Ri-loom Jaiñtia da man i iwa sahteiñ bait wei kam kiwa mihkhmat paidbah man ki kiwa sarom (khamtam wow em ha ka liang pyrchah) neidaw wymye ki wow leh iwon iwon hajrong kani ka bynta.

Kamtæ ki MDC ka liang pyrchah waroh hiwot da pynsñiaw ki yei pyrchah ya ka EC wa katni deiwa dawa leh ya u CEM yong ka Council, u Thombor Shiwat wow hiar chuki noh u.