Jowai: Ka seiñ All Hynniewtrep People United Front (AHPUF), da dawa ko naka Jowai Municipal Board (JMB) wym hoi u pynsah ko ya i jhep hapoh ka chnong Jowai ha ka sngi Bibar.
Ka seiñ da chem ko wa man ka sngi Bibar ka JMB ka da ieh ko nadooh ka Sngi Choh That yei jhep khlem kit ya kiwa em ha Laad Wah Nangbah, ha Laad wow lai cha Pohksur (Mission Compound) wa ha thaw pynyieñ kari wa tip kam ka Stand War kamjooh ha u sarok wa lai cha Thomas Jones Synod College wa ha Iaw Thymme Ladthadlaboh.
Ka seiñ da ong ko wa i em ini i jhep da wanrah ko ya i sma-tung wa chyrkhei ha Iawmusiang wa hapoh ka chnong Jowai waroh kawi wei da ktah ko ya ki Khristan kiwa lai wa wan yaseiñ ha ka sngi Bibar kamjooh ya ki paidbah kiwa lai wa wan neibhah ha kani ka sngi leh em kiwa boon kiwa chong dai. Da ktah ko leh ya ki paidbah ya i chait i khiah yong ki paidbah wa haap riñ mynsien ki daka la-ær kawa sma-tung kawa mih na kini ki jhep wei da dai sarom ko leh ya ka chnong Jowai ha khmat ka pyrthai neibhah da boon kiwa wan uiñke suwari kiwa wan cha ka thaiñ ri-loom Jaiñtia katni.
Kamtæ ka seiñ da kyrpaad ko ya ka Jowai Municipal Board kamjooh leh yaka Jaiñtia Hills Autonomous District Council wa ya u Deputy Commissioner wow chimkhia wow pynkhooid ya ini i jhep nadooh ka janmiet ka sngi Choh That.
U President ka seiñ u John Phawa da ong u wa kamwa chimkhia waroh wow pynkhooid ya ki yung ki sem toh u chimkhia leh wow pynkhooid yaka chnong ka thaw yong i wei ka Municipal toh u chimkhia wow leh yei kaam yong ka.
Neiliang ka seiñ da kyntu ko leh ya kiwa chong chnong khamtam ha ki sngi yaaw wow pynlang ki ya i jhep hadied wa ki dadep ki u chong dai.
Discussion about this post