Ka seiñ All Hynniewtrep People United Front (AHPUF) da dawa ko yaka sorkar Meghalaya Democratic Alliances wow pynlait noh smat katwa ye yaki Challan mooyong hapoh ka jylla.
Katkam wa tip ka seiñ wa ka Supreme Court da phah ko yaka sorkar wa ka toh u pyndep ko ya i challan ya u mooyong wa da dep thaw wa da dep chim yukheiñ hapoh le bnai. Neibhah kamwa man kattæ i challan mooyong hapoh Jaiñtia Hills toh iwa da kynrum kynram palat wei man ko i myntoi du yaki heh spah, ki Montri wa kitu kiwa emkti wa ki heh ki haaiñ, wow ksih beiñ ya kiwa dooh wa duk, kiwa kup chiliang sem chiliang.
Ka seiñ da dawa ko leh wa ka sorkar toh u pynduna dor ko yaka Challan næ i dor bai luti neibhah kamwa man kattæ ym tip de wa em Challan næ ym em tangwa ka ka bai luti næ bai Challan man ko hadooh T. 95,000 hadooh T. 100,000 chisien lai nadooh Khliehriat chadooh cha Byrnihat. I lut chi kari u mooyong haka Truck kawa 10 lane 12 chaka poi hadooh T. 3-4 lak nadooh i thaw thap chadooh cha thaw dai. Kamtæ da ong wa ki pli kiwa khayi neiwon de u yoh nong ki khamtam hawa sih ka yaw wei lada jia iyi iyi hawa lai wa wan.
Ka seiñ da ong ko leh wa u mooyong toh u yong i ki tre ri, uwa tih hi, ki kari leh ki yong i, tangwa hawa lai luti du hapoh ri yong i kawa jngai du kamwa 130 Km, ha kawon ka yurim wa da pynku ya i dor Challan næ ka bai luti hadooh katni katni? Iwa man leh kamwa lute yaki mar ki mata, i bor wa i umsyep yong u paidbah.
Da ong leh wa manda pynlait yaki Challan, toh u e yutip næ pynbna paidbah deiwa che wa tikna khnang wa waroh kiwa kreh ha kani ka kaam wow yoh laad yoh luti ki wow ya krehlang. Ym toh wow leh tooh ne leh sop sop ya kani ka kaam, wei u e du ya ki kattu katni ngut ki he spah næ kiwa emkti, kiwa yajan wa ki heh ki haaiñ wow yoh yaki Challan.
Kamtæ hajrong ini i kaam, ka seiñ da dawa ko yaka sorkar wa toh u chimkhia ya ini i dawa yong ka seiñ khnang yow bha yow myntoi ki paidbah khamtam kiwa dooh wa duk. Wei lada ka sorkar ym chimkhia ko ya ini i dawa, ka seiñ daw pyrkhat ko wow thooh ki laad ki luti yow kdoh u khoom ya kani ka kaam. Neibhah lada e laad wow leh bait kamni, ka sorkar daw yoh ko u leh katwa ngait wei kani ka kaam mooyong hapoh ka jylla daw man ko i tim yaka ri wa ka jaitbru yong i.
