Jowai: Hadien wa ka seiñ All Hynniewtrep People United Front (AHPUF) lyngba u President u J. Phawa wa u C. Sungoh Secretary yoh yutip ki yei sih u sarok National Highway-44 nadooh na Mookyndur West Jaiñtia Hills District hadooh wa poi Ratacherra, East Jaiñtia Hills, ka seiñ da lai li pait lai sylli wei chem ko leh yei sakhiat wa da sih chi lynter u sarok nadooh West chadooh East Jaiñtia Hills District.
Ka seiñ da yoh ko u yaklam wa u Manager ka Lumshnong Tollgate heiyatoh wei sih uni u sarok, wei neiliang yong oo da e daw u deiwa ong wa toh i por lyiur wa haap slap tæ ym ye u pynchna. Ka seiñ won da ong ko wa uni u sarok da sih u la kamwa chi snem haroh wei kammon ym em chna nadooh i por wa rang i bneiñ.
Kamtæ ka seiñ da dawa ko naka National Highway Authority of India (NHAI) wow chna smat noh ya uni u sarok wei u chna leh dei miat yow neh slem u.
Lymda kamtæ ka seiñ ym e laad de ko yaka NHAI wei ong ko leh wa daw lai yaklam ko cha ka yung krehkaam ka NHAI wa em ha Shillong, nalor wow booddien leh hadooh wow man kaam.
