Jowai: Ka AJYWO – East Jaiñtia Zone ha ka khubor na u Kd. H. Ryngkhlem, President ka seiñ, da dawa ko na ka GR Infra Ltd, ka Company wa pynkreh ya u sarok NH-6 nadooh West hadooh East Jaiñtia Hills wow chna pynmiat smat noh yei tooid ki kynroh (Retaining Wall) yong u NH-6 ha ki bynta ka thaaiñ Tongseng wa Sonapur, East Jaiñtia Hills khnang wow lait wei ym thut i lai i wan wei kamjooh na i jia wa sñiawsih ha ki sngi wow wan.
“Ka seiñ ha i lai sylli ya ki bynta u sarokbah NH-6 ha ki thaaiñ Elaka Narpuh, East Jaiñtia Hills, da chem ko yei tooid i khyndaw wa joor ha ki bynta wa na tre i kynroh wa kyrchaan ya u sarok iwa neiliang ka Wah Lukha wei ini i tooid i khyndaw da wanrah i yei piah wei kaad u sarok wei i khyndaw ye i wow tooid waroh ha iwon iwon i por khamtam heini i por wa joor slap,” da ong u Kd. H Ryngkhlem.
Da ong u leh wa ym du kattæ, ini i tooid khyndaw man i iwa joor bha ha ki thaaiñ Tongseng wa Sonapur iwa ye wow pynthut yei lai i wan kamjooh leh i jia wa sñiawsih ha kani ka thaaiñ khamtam ha ka por lyiur wa katni.
Chooh chooh da ong wa i daw tre man i i wymye u tip lada toh neidaw wa slap joor namo wa kreh habra kani ka Company ya uni u sarok wow tooid ini i khyndaw.
Kamtæ ka seiñ da dawa ko na ka NHAI wa na ka GR Infra Ltd wa ymtoh u pynslem wow chna pynmiat noh yeini kat dang biang por, wei i chna leh toh u man i iwa biang wa iwa skem khnang wow lait na iwon iwon i jia wa sñiawsih.
Discussion about this post