Jowai: Ka AJYWO Central Body da dawa ko na ka JHADC wow sangeh chwa wow e Trading Licence thymme cha ki baar jylla ha waroh kawi ka ri-loom Jaiñtia wei wow bichaar bniah bha katkam ki kyndon aiñ chwa wow e ya ka khnang wow lait ko u ktah ya ki tre jylla.
“I yoh NOC wa Trading License yong ki baar jylla ha Jaiñtia Hills khlem bichaar bniah chwa wow e (NOC & TL); i yoh wan khayi pateiñ laitlooid kiwa na baar deiwa lai lait ya ka aiñ, da booh ko hei maa ya i kamai khamtam heini i por wa dooh khih dooh kreh,” da ong u MH Dkhar, President ka AJYWO Central Body.
Ki RTI wa yoh ka AJYWO hajrong ka Trading License wa ka Employee’s Service License ka seiñ da sñiawsih ko neidaw wym chimkhia ka JHADC hajrong ini waroh.
Hajrong kini waroh ka seiñ da kylli ko wa lada man kamni bait kammon u yoh khih yoh kreh ki tre jylla neibhah ya kini waroh da khyrrup da ki baar jylla lut.
U MH Dkhar da pynkynmoo u leh wa i kaamram ka JHADC toh u pait nyngkong ko yei miat i bha ka jaitbru ki tre ri tre jylla.
Kamtæ ka seiñ da dawa ko wow chimkhia hajrong ini waroh deiwa bood ya ka aiñ The Jaiñtia Hills Autonomous District (Trading by Non-Tribals) Regulation Act-2011 wa ka The Jaintia Hills Autonomous District (Trading by Non-Tribals) Rules-2015, chwa wow e Trading License.
Chooh chooh ka AJYWO da dawa joor ko na ka JHADC wow sangeh chwa wow e Trading License thymme deiwa pyrkhat yillu ya ka jaitbru wei wow kynreh ya ka Employee’s Service License dei langær.
Discussion about this post