Jowai: Ka AJYWO Central Body, da dawa ko na ka sorkar jylla wa katni wow pynmih noh sa ka wi ka C&RD Block wa thymme ha ka thaaiñ Lumshnong wei wow pynneh ya ka Wapung C&RD Block ha Wapung hi katkam wa da wai moo-yurim ya ka ha ka 22 Naitung, 2017.
“I leh ka sorkar MUA-II deiwa kyrriah ya ka Wapung C&RD Block na Wapung du hadien 8 bnai nawa wai ya ka da wanrah ko yei kthang mynsien wa i yapiah yapra hapyrdi ki paidbah kiwa haap hapoh kani ka block,” da ong u MH Dkhar President, AJYWO Central Body.
U Dkhar, da ong u leh wa man i iwa phylla wow yoo yei kyrriah ya ka C&RD Block na Khliehriat cha Wapung chimpor i hadooh 4 snem katwa wow kyrriah ya ka na Wapung cha ki thaaiñ Lumshnong won da chimpor i du chi læm donhi.
Da pynrap u leh deiwa yaroh ya ka Sorkar MUA-II wa nachwa heiyatoh wow wanrah ya ka Wapung C&RD Block cha ki thaaiñ Lumshnong du ha ki por wa kajiak wei lada ka sorkar leh ko kamni bait wow wanrah ya ki kaam pynroi ha ka jylla, ym man de ko kawa sahdien la man katwa man.
“Katni du neidaw wa lehke ka sorkar warim ya ki paidbah ka Wapung C&RD Block, ki paidbah, najrong i lutphut wow lai cha ka, da haap leh wot wow lai cha ki yung kasari hajrong kini ki kaam”, da pynrap u MH Dkhar.
Ka seiñ da ong ko leh wa sñiawthooh ko yei eh i khoo ki paidbah ka East Jaiñtia Hills kiwa sah ha ki bynta wa jngai (khamtam kiwa na i liang mihsngi) ka District katwa kamtæ ka sorkar da toh u wai noh ko ya ka Block wa thymme ha kani ka thaaiñ Lumshnong.
Kamtæ ka seiñ da dawa ko wow pynbait noh yeini i kulmar waroh khnang wow yoh sakhiat ki paidbah yei myntoi iwa ki em hok ki.
Discussion about this post