Dawa ka Amita wow kem ya u Working President ka NPP Jaiñtia Hills wa yahkhmat wow pynmynsoo ya ka Agnes wa ya ka

Shillong: Ka Amita Sangma kawa man ka lok yong ka President ka Civil Society Women’s Organisation (CSWO), ka Agnes Kharshiing kiwa da chah pynmynsoo ha ka 8 tarik uni u bnai ha ka chnong Shohshrieh, East Jaiñtia Hills District, da dawa ko wa toh u kem wei wow pynchitom ya u bru wa seiñdur wow pynmynsoo ya ki uwa man leh u kam u Working President ka National People’s Partry (NPP) Jaiñtia Hills.

“Nga dawa O wa toh u kem ya uni uwa yahkhmat ka NPP Jaiñtia Hills, u Nidamon Chullet uwa man leh u wa seiñdur wa hakhmat dooh wa thmu wow tynyap ya i,” ong ka Amita hawa klam wa kiwa pathai khubor ynnin ka sngi.

“U Chullet toh uwi na pyrdi kiwa seiñdur wow yahkhmat wow thombor ha ka 8 tarik, wei toh u kem noh chi syndon, wei ya ini da khana O leh hakhmat u ADM wa wan takit ya nga,” da pyntip ka Amita.

U Chullet hadooh katni toh u Working President ka National People’s Party (NPP), Jaiñtia Hills District, kawa man leh ka party kawa yahkhmat ya ka sorkar wei ha i jooh i por man u kam u waheh chnong ka chnong Mynkrem kawa haap ha Shangpung wei ha i jooh i por man u kam u President ka Jaiñtia Hills Truck Owners Association (JHTOA).

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka Amita da pyntip ko wa i chah thombor ko wa ka Agnes toh wa lai chondur ki ya ki kari kit mooyong kiwa toh ki yong u Chullet ha Kongong, kawa jngai du kamwa 5 km na Shohshrieh.

Ka Amita da ong ko wa u Chullet da kyrpaad u ya ka Agnes wow yaklam pynbait tangwa ka Agnes da kyntait ko wei manda poi ki ha Shohshrieh ki da chah khang luti wei da chah pynmynsoo ki.

“Lada ym kem ya oo katni, i mynsien yong i u em ko hei maa neibhah ye u wow phah tynyap ya i ha iwon iwon i por.” da ong ko.

Ka Amita da ong ko leh wa lada jia iyi iyi ya ka wa ya ka Agnes, ka sorkar haap ko wow chim ya ka kitkhlieh. “Lada ka aiñ kem ko ya u Chullet u yoh ko leh u kem ya waroh kiwa emkti ha i thombor,” da ong ka Amita.

Ka Amita da ban joor ko leh wow e bait ya ka takit ha ka Central Bureau of Investigation (CBI) hajrong ini wa jia neibhah da em i suba joor wa ki pulit leh ye ki u emkti ha ini i chah thombor.

Also Read: Psiah NPP sa u Nidamon Chullet