Ka yung krehkaam u Waheh Chnong Bataw lyngba ka Village Development Council kawa kdup kamjooh wa pait u pynlai bait lai ryntih yei krehkaam ki chnat krehkaam waroh nadooh ki Sub-Committee waphær waphær, ki seiñ kreh monsñiawbha, ki dong ki chnat, ynnin ka 23 tarik da pynman ko ya ka Village Development Programme 2024 ha yung Dorbar Hall Umlatyap Bataw kawa man leh ka yung krehkaam u waheh chnong.
Da wan wow sakhilang da u Shivansh Awasthi, Deputy Commissioner ka East Jaiñtia Hills District Khliehriat kam u kongsan wa u Dr. T. Shylla, Block Development Officer ka Wapung C&RD Block kam u symbood kongsan wei ya ka yalang da pynlai da u Bhalang Suchiang uwa man leh u Chairman Chnong wei da yoh ki kyntien pynche chaphang i thmu kani ka sngi na u Waheh Chnong, u Deihok Sumer heiwa da klamu chaphang i emkaam wow yoh yei kaam pynroi na ki bor sorkar hapoh chnong nadooh ki thaw noh jhep wa paka, wow chna pynbha ya ka soodong ka Dorbar Hall kamjooh ya ki kaam yalehke wa man ka laad wow yahluti ya ki khon ka chnong wa em ki sap waphær waphær ha ki kaam Sports.
Chooh chooh da ong u wa ka sorkar lyngba ka yung krehkaam u DC dang leh mylliñ ko yei pyrtuid ka chnong Bataw ha ka Survey yow chna sarok 4-Lane wa da thmu u chna da ka NHIDCL neibhah la man katwa man leh wym ye u kiar yei bynta ki thaw ka chnong Bataw lada ya utai u surok em i thmu wow pynlai na kani ka thaaiñ, kamtea daw booddien yei rukom long rukom man yei thmu wow chna ya u sarok, wei dadep leh wow phah dei thoh ha kini ki kajiak sngi cha u Deputy Commissioner ka East Jaiñtia Hills District wow chimkhia yei dawa ka chnong.
U Dr. T Shylla, BDO hawa e yei klam kam u symbood kongsan da khana u wa kiwa yahkhmat ka chnong toh kiwa da kreh chitom wow wan yachem wa oo man-i-por wow yaklam ya ki kaam pynroi hapoh ka chnong Bataw wei neiliang yong oo katwa chah ka laad u e ka kti timun tidiang wow yarap da ki kaam pynroi lyngba ka MGNREGS wa na kiwi de ki Scheme wa ye u wan na ka yung krehkaam yong oo.
Hawa e yei klam, u Deputy Commissioner da ong u wa sñiawkmen u wow chah khut sñiawbha ha kiwa yahkhmat chnong ha kani ka yalang wa em yumut bha wei da ong wa u waheh chnong u Deihok Sumer da pynsñiaw u neipor cheipor hawa wan yachem wa oo, da ong wa da kular cha oo wa manda dep kani ka lehkmen snem thymme, daw yaleh yeiwa emkaam neibynta i kyrpaad yong ka chnong Bataw.
Da klam u leh chaphang i lehkhooid wa emkaam bha u pynyoosuk chooh ya ka chnong Bataw deiwa thung ya ki tre dieñ ha lynter u surok hapoh chnong kam chibynta u khriñ ya ki bru wa na baar u wan sakhi ki yei miatdur ka chnong Bataw wei yeini ye u leh deiwa ya krehlang kiwa chong chnong wei kamjooh wa ki bor sorkar.
Kiwi de kiwa e yei klam ha kani ka sngi toh u Secretary Dong Border Bataw, u Sngewhame Sumer, u Secretary ka Bataw VEC, u Waster Sympli wei yei kyntien e khublei da yoh na u Secretary Chnong, u Nehlang Suchiang wei da pynchongchit ya kani ka yalang dei chaad na kiwa yahkhmat ka Village Organisation yong ka chnong Bataw.
Discussion about this post