Hadien wa da mih pyrthai ini wa dep yei pynmih hukum ka Special Branch ka Assam Police deiwa phah ya waroh ki DC wa ki SP ki District wow chim yukheiñ heiyatoh i kylla niam hapoh ka jylla Assam wei ya kani ka chithi da phah hadien da dep pynman ya ar tylli ki yalang hajrong ini i kaam kiwa da pynman ha u Khonchonglad (Nov) wa u Kmaichonglad (Dec) 2022.
Heiyatoh wa ini, ka Catholic Association of Shillong da pynsñiaw ko yei sñiawkhia wei pisa lynga neibhah iwa thoh ha kani ka chithi toh iwa pynkhyrngiat heiwa da paan yukheiñ hadooh katwon tylli ki yungmane kiwa da sdang ha chi snem wei katwon i thaw wa da e yow leh yeini, hadooh katwon ngut kiwa da kylla niam ha ki 6 snem wa da lai, i pyrtuid ki yungmane kiwa dang krehkaam hadooh katni, ki bru wa emkti wow pynkylla niam, ki daw wa kylla niam wei kammon wow leh yow pynsangeh yeini.
Kam ka Association da ong ko wa ini da che bha wa da mang du ya ki Christan wa em hapoh ka jylla Assam kiwa man leh kam ki khian paaid iwa man leh pyrchah yei hok wa da e da riti synchaar hapoh ka Article 25, 26, 27 wa 28 kiwa da e bor da ka aiñ wow jied ya kawon kawon ka niam wa kwah ki bru.
Chooh chooh da ong leh wa kani ka chithi da pynyoo ko yei leh chiliang deiwa paitkhmat ya ki Christan da ka sorkar iwa man leh wym ye wow pdiang da ka aiñ.
Da ong leh wa ini da pynyoo yei wym sñiawngooh ya chiboon ki kaam wa da yarap ki Christan hapoh ka jylla khamtam ki Balang ya ka thaaiñ waroh kawi deilang ya kani ka jylla. Kamtæ da dawa na ka sorkar pyrdi wow tuklar ko hajrong ini i chah paitkhmat wei i thmu wym ye chaniah wa da leh pyrchah ya ki Christan heiwa da kyntu leh ya ka Home Ministry wym toh u chah u leh ya iwon iwon iwa da mang du wow takit ya ki Christan.
Da kdaw leh wa ki Balang Christan da yarap ki hei chait i khiah, ka puræ puthi, ka khayi pateiñ kamtæ da kyntu leh ya ka sorkar Assam khamtam u Montri Rangbah ka Assam, u Himanta Biswas Sarma wow pyndam ya kani ka hukum yow wanrah yei kyrmen wei chaniah ya ka sorkar yow em leh i mynsien maya ri.
