Ka Meghalaya Pradesh Congress Committee (MPCC) da pynsñiaw ko yei khyrngiat yei chah pynbaad u dkhot warim ko, uwa man katni kam u Symbood Montri Rangbah, u Sniawbhalang Dhar wa jooh kyrchaan poisa u ya ka HNLC. Ka MPCC da ong ko wa ym em tip ko iyi iyi chaphang ini katkam wa pynbaad ka HNLC wa u Sniawbhalang jooh kyrchaan poisa u ya ki heipor wa dang em u ha ka Congress.
Tangwa da ong wa lada toh iwa sakhiat, da leh u dei bor yong oo samen khlem da tip ka Party.
Ka Congress da ong ko wa ini i pynbaad toh iwa khia bha, kamtæ da dawa wow pynman da ka takit kawa khooid khlem da em kiwa tuklar wei da kyntu leh ya u Sniawbhalang wow hiar chuki u kam u Montri sorkar kat wym pu dep ka takit.
Da kular ki leh wow ya krehlang wa ka takit wei da pynrem ki yei emkti kiwon kiwon wa ki bru wa man pyrchah ri.
Hajrong ini i jooh, ka Voice of the People Party (VPP) da dawa ko wow pynman yei takit da ka National Investigating Agency (NIA) kamjooh wow hiar chuki noh u Sniawbhalang kam u Montri sorkar.
Heiyatoh wa ini waroh, uwa e ktien ka sorkar MDA-II u Paul Lyngdoh, da ong u wa bien hi wow pynman ya ka takit deiwa em sakhiat iwa tikna wa skem wei ymtoh du wow pynbaad donhi.
U Paul Lyngdoh da ong u wa lada takit da ka NIA u man ko kawa laitlooid hanla em ki kaam Politics wa pyrchang u ban. Da ong u leh wa u President ka MPCC, u Vincent H Pala toh uwa ye bha u pynche yeini wa pynbaad ka HNLC neibhah u Sniawbhalang toh uwa theh chiboon cha ka Congress.
Discussion about this post