Shillong: Ka Congress kawa em ha ka liang pyrchah ha ka jylla da dawa ko wa ka sorkar toh u pyntip paidbah ko ya ki pyrtuid kiwa yoh COVID-19 ha ka jylla, wei da pynbaad ko leh ya ka sorkar Meghalaya Democratic Alliance (MDA) hapoh i yahkhmat u Conrad K Sangma yei wymye ko u kdoh u khoom yei poor u COVID-19 ha ka jylla heiwa katni kiwa yoh khñiang dang ku bha ki.
Uwa ektien ka Congress Legislature Party (CLP) ha Meghalaya uwa man leh u Secretary ka All India Congress Committee (AICC), u Zenith M Sangma da pynbaad u wa ka sorkar nadooh wa sdang wan ki tre jylla na baar, ym em chimkhia ko wow leh ya ki Test, tangwa da leh du da ki Thermal Test ha ki thaw psiah wei da phah won wow leh ya ki Quarantine ha yung, heiwa da pynbaad u leh wa i leh ya ki Real-Time Polymerase Chain Reaction (RT-PCR) toh hadien wa yoo wa sdang ku kiwa yoh ya uni u khñiang.
Da ong u wa ini i leh ka sorkar da wanrah i yei maa ya ki paidbah neibhah boon na kiwa wan kiwa leh ya ka Quarantine ha yung da man Positive hadien wa da Test biang ya ki, wei boi kini ki bru da yachem ki wa kiwi tawon ki bru.
Da phylla u leh wa yoh ki kattu katni ngut ki bru wow lai khawai cha Greenwood Resort kawa em ha Khanapara, Assam, deiwa ong wa ini man i tkhoh ha i rukom krehkaam ka sorkar wow yada ya ka jylla na i poor u khñiang kjut.
U Zenith da ong u wa ha ka yalang wa da khut da u Speaker ha ka tayaw wa dadep, neiliang ki MLA ka Congress da dawa ki na ka sorkar wow pyntip paidbah ya ki pyrtuid kiwa yoh khñiang COVID-19, deiwa ong wa ka sorkar da kyntait ko wow e ya ki pyrtuid neibhah ya chah ktah kiwa yoh khñiang.
Da ong u wa man iwa emkaam wa ki paidbah wow tip ya kiwa yoh khñiang khnang wow yada pyn daki yaki hi, deiwa pynrap wa i yakhun ya ka khlam COVID-19 ym toh du da ka sorkar, tangwa i yaleh man i yong ki paidbah leh. Da ong u wa lada pyntip te em i chah ktah kiwa yoh COVID-19, mut i wa ka sorkar ym chimkhia ko wow pynsñiawthooh paidbah yow dam u em i yoobeiñ ya kiwa yoh khñiang COVID-19.
Da ong chooh chooh u wa ka sorkar hadooh katni da kyntait ko wa em i poor u khñiang COVID-19 ha ki chnong ki thaw, tangwa kamwa man na i ku kiwa yoh ya uni u khñiang pynyoo i wa poor u khñiang ha ka imlang sahlang namo ka Community Spread.
Heijooh i por u Zenith da ong u wa hadien wa da wai ya ka Lockdown næ pynyinsur ya ki kreh da booh leh ya ki kyndon wow pteiñ wow sap Mask wow yajngai para bru ha ki thaw paidbah wei lada em kiwa tyngkheiñ daw chah daiñ kuna ki, tangwa kamwa man katni ha Meghalaya ym em wa bood ya kitæ ki kyndon wa ka sorkar ym chimkhia ko.
Chooh chooh da ong u wa ha Meghalaya suki ware u yoh ya ki Report hadien wa da chim ya ki nongmuna wei ki bru haap yang ki hadooh chi tayaw deiwa chong Quarantine. Da ong u leh wa katkam i batai u Director ka AIIMS, ki Rapid Antigen Test ymye u pynsakhiat lada ki bru chah ktah ki ha u COVID-19, tangwa toh u leh bait da ka RT-PCR.
