Ka Dorbar Ki Waheh Kur Ri Jaiñtia hei yahkhmat u K.L Pariat kam u President deilang u Pyrkhat Shylla, Vice President wa u Jesper Bareh Asst. General Secretary, ynne ka sngi da lai li mih biang ki cha JHADC yow dawa na u CEM wow tipmit noh smat da ka aiñ yong ka Council yaki jait kur waphær waphær, neibhah wa ini i dawa dang sahteiñ i hadooh katni wot hawa neiliang kiwa yahkhmat ka Dorbar Ki Waheh Kur kamjooh ki jait kur waphær waphær da lai pynkynmoo ki neipor cheipor deiwa e dei thoh kamjooh i yachem wa u CEM, u EM wa toh u pait kamjooh wa ki sahep ka Council.
Hadien wa kini kiwa yahkhmat seiñ kur da yoh yachem ki wa u CEM ka JHADC, u Thombor Shiwat, khana ki wa u CEM da ong u wa daw e noh da ka Executive Order wei wow lum da ka Executive Committee yow pynmih da ka Resolution.
Kamtæ ini i klam yong oo chibynta da wanrah kyrmen ko ya ki, wei da booh por haroh ki wa hapoh ka 25 tarik uni u bnai chwa wow pynmih ya ka Notification neibynta ka Election MDC wa ka Executive Committee hapoh i yahkhmat u Thombor Shiwat kam u CEM da toh u pynmih noh ko dei thoh khnang wa kam ka jaitbru u chngaaiñ ko.
Hajrong ini kiwi yahkhmat ka Dorbar Ki Waheh Kur da e yumut haroh ki ya u CEM wa toh u phah leh ya ka Executive Order cha ka yung krehkaam u DC ka East wa West Jaiñtia Hills khnang chwa wow e ki ya ki Schedule Tribe Certificate u e ki katkam wa da tipmit da ka JHADC.
Heijooh i por kyntu haroh ki ya kiwa mihkhmat ki sahep wow bood ryntih wei wow krehkaam ki katkam ka aiñ ym wow yang hadooh wow em kiwa yakhih næ mih sarok neibhah kani ymtoh ka nuksa wa bha yaka pateiñ wow wan.
U K.L. Pariat khana u wa hei yachem ki wa u CEM da yaklam haroh ki hajrong i wan psiah ki baar jylla kiwa wan kam ki jaitbru ri-loom na Myanmar wa ki Garo na Bangladesh, deiwa dawa ya oo kam u khlieh ka JHADC wa toh u e noh daka hukum ya ki Dolloi ki waheh chnong wow sangeh e NOC noh ki cha kam kini ki jaitbru wa wan kam chnong.
Discussion about this post